Сенаторлар сапары
![](/uploads/posts/2024-07/medium/1721104733_0eb2bcf7-c999-43f5-ba51-7ac297704f27.jpeg)
«Руханият» орталығының жұмысымен танысты
Парламент депутаттары ең алдымен жаңадан салынып жатқан «Руханият» орталығының жұмысын көрді. Құрылыс алаңында тапсырыс берушілермен және мердігер мекеме өкілдерімен пікірлесіп, атқарылған жұмыстар мен алдағы жоспарларды саралады.
– Сыр елінің жауһар жәдігерлерін сақтап, келер ұрпаққа жеткізуге, жастарды отаншылдық рухта тәрбиелеуге және тәуелсіздіктің қасиет-құндылығын ұғындыруға әрбіріміз жауапкершілікпен қарауымыз қажет. Осы жұмыстарды жүйелі әрі тұрақты негізде, бір орталықтан жүргізу мақсатында барлық 7 ауданда музей, кітапхана, архив, неке қию залы, ардагерлер және аналар, жастар орталықтарын біріктіретін, типтік үлгідегі «Руханият» орталықтарын салу туралы бастама көтеріліп, шешім қабылданғанын білеміз. Бұл – әртүрлі бағытта қызмет көрсететін мекемелерді бір орталыққа оңтайландыру арқылы бюджет қаражатын үнемдеуге, әкімшілік шығындарды азайтуға мүмкіндік беретін тың жоба, – деді Наурызбай Байқадамов.
Сәуір айында іргетасы қаланып, құрылысы қарқынды жүргізіліп жатқан нысан Сыр руханиятына қалтқысыз қызмет ететін, алдыңғы буынның өмір жолын ұлықтап, жас ұрпақты тәуелсіздік рухында адал еңбекке, ізгілікке үндейтін нағыз руханият ордасы болары анық. Осы ретте сенатор Руслан Рүстемов жаңа нысанның салыну мақсаты, ұрпақтар сабақтастығын сақтауда атқаратын қызметі мен аймақтың рухани-мәдени дамуы туралы пікір білдірді.
– Осы өңірде, осы ауданда қызмет еткеннен кейін облыстың әр жетістігі мен жаңалығына тілектеспіз. Қызылорда қазір қарқынды дамып, ерекше серпілістерге құлаш сермеуде. Мәселен, биыл «Сыр елі – жыр елі» атанған қасиетті өңірде «Руханият жылы» жарияланды. Бұл кезең айшықты жобалар мен жағымды жаңалыққа толы болмақ. Атаулы жылдың бастауындағы алғашқы сый – Қызылорда қаласының төрінде 1000 орындық, сәні мен салтанаты келіскен «Өнер орталығы» ашылды. Қызылордада 650 орындық музыкалық колледж ғимаратының құрылысы жүруде. Өңірдегі барлық мәдениет үйі жанында «Адал адам» орталықтары жұмыс жасауда. Балалар мен жасөспірімдерді шығармашылыққа баулып, өнерін өрістететін «Шығармашылық академиясы», 2 ауданда Оқушылар үйі мен Өнер мектептері салынуда. Жалпы құны 12 млрд теңгеге жуық «Руханият» орталықтары барлық аудан орталықтарында салынып, келер жылы пайдалануға беріледі. Сондықтан құрылыс жұмысын сапалы әрі уақытылы жүргізуді бақылауда ұстау керек, – деді Руслан Рүстемов.
Нысан басында аудан әкімі Берік Сәрменбаев құрылыс жұмысы жоспарға сай жүргізіліп жатқанын айтты. Сондай-ақ ұлтымыздың дамуында маңызды рөл атқаратын бұл жобаның басы-қасында жүрген құрылысшылар өз ісіне жауапкершілікпен қарап, құрылысты сапалы жүргізетініне сенім білдірді.
Қоғамдық кеңес мүшелерімен кездесті
Сенат депутаттары ауданға жасаған жұмыс сапарында аудандық қоғамдық кеңес мүшелерімен, мәслихат депутаттарымен кездесті. Кездесуді аудандық Қоғамдық кеңес төрағасының міндетін атқарушы, мәслихат депутаты Ақтөре Ибрагимұлы ашып, жүргізді.
Кездесуде сенатор Руслан Рүстемов Парламент қабырғасында қабылданып жатқан заңдар мен атқарылған жұмыстар жөнінде кеңінен айтып өтті. Атап айтқанда, Мемлекет басшысы айтқан Әділетті қоғамды, азаматтардың үніне құлақ асатын мемлекеттік құрылымды қалыптастыруға септігін тигізетін заңдарды қабылдауға басым бағыт екеніне тоқталды.
– Мемлекет басшысы Қасым-Жомарт Кемелұлы Тоқаев өтпелі кезеңде елде орын алған саяси-экономикалық дағдарыстардың себебін талдап, салдарын саралаумен қатар, алдымызға нақты міндеттер қойды. Конституциялық реформаларға сай саяси реформалар кезең-кезеңімен іске аса бастады. Мұның көрінісін көппартиялы Парламент жасақталғанынан көруге болады. Сондай-ақ Үкіметтің өкілеттігі кеңейе түсті. Енді Президент Әкімшілігі елдің әлеуметтік-экономикалық дамуына қатысты стратегиялық бағыттарға жауап бермейді, саяси штаб ретінде жұмыс істейді. Яғни түрлі салаға қатысты шешімдерді қабылдау құқығы Үкіметке өтті. Аймақтардың бюджетке қатысты дербестігі арта түсті. Мұның бәрі атқарушы биліктің жауапкершілігін арттырып, сайлаушылар сенім білдірген өкілді орган «бақылаушы қызметін» іске асыратын саяси құрылым ретінде ілгерілеп, қоғамды демократияландыруда шешуші рөл атқарады, – деген Руслан Рүстемұлы «Қоғамдық бақылау туралы» және «Қазақстан Республикасының кейбір заңнамалық актілеріне қоғамдық бақылау, әкімшілік рәсімдерді жетілдіру бойынша өзгерістер мен толықтырулар енгізу туралы» қабылданған заңдар бойынша ой-пікір білдірді.
– «Қоғамдық бақылау туралы» және «Қазақстан Республикасының кейбір заңнамалық актілеріне қоғамдық бақылау, әкімшілік рәсімдерді жетілдіру бойынша өзгерістер мен толықтырулар енгізу туралы» қоғамның көп сүзгісінен өтті. Заңда қоғамдық бақылау саласын мемлекеттік реттеу, қоғамдық бақылауға қойылатын талаптарды айқындау, қоғамдық бақылау объектілері мен субъектілерінің құқықтары мен міндеттерін регламенттеу ұсынылған. Қоғамдық бақылау арқылы азаматтар жалпыұлттық жобалардың сапалы іске асырылуын, қоғамдық бақылау объектілерінің шешімдерінде қоғамдық пікірдің ескерілуін, қоғамдық бақылау объектілері қызметінің айқындығы мен ашықтығын қадағалауға мүмкіндік алады. Заңды қабылдау қоғамдық бақылауды ұйымдастыру және жүзеге асыру аясында қоғамдық қатынастарды реттеуге мүмкіндік береді, – деді сенатор.
Өз кезегінде сенатор Н.Байқадамов Сенат қабырғасындағы екі ай көлеміндегі жұмысында алдына нақты міндеттер қойғанын, алдағы уақытта сол мақсат-міндеттерді жүзеге асыруға жұмыстанатынын жеткізді.
Кездесуде аудандық қоғамдық кеңес мүшесі М.Келдібаев жерді тиімді пайдалануды реттейтін республикалық деңгейде мемлекеттік құрылым құру, жергілікті жерде ауылшаруашылық бөлімі мен жер қатынастары бөлімін қайта бөлу мәселесін көтерді. Ал аудандық мәслихат депутаттары А.Есназар мен Е.Жақып ауылшаруашылығы саласына қажетті мамандар дайындау мәселесін қайта пысықтау жөнінде айтып, аудандық мәслихаттың атқарып жатқан жұмысынан хабардар етті.
Мектеп құрылысын уақытылы аяқтау маңызды
Сенат депутаттары Тереңөзек кентіндегі «Жалын» сауықтыру лагерінде болды және Н.Ілиясов ауылындағы №132 Т.Айтбаев атындағы орта мектепке жүргізіліп жатқан құрылыс жұмыстарымен танысты. Мұнда аудан әкімі Б.Сәрменбаев аудан бойынша жүргізіліп жатқан құрылыс жұмыстары туралы айтты.
6 ауысым бойынша 130 баланың демалуын қамтамасыз ететін «Жалын» сауықтыру лагері жөндеуді қажет етеді. Бүгінде атқарылуы тиіс жұмыстардың жалпы жобасы әзірленген. Жобаға лагерьдің кіреберісінен бастап балалар демалатын үйлерді жөндеу, ойын алаңдарын салу, сахнаны қайта жаңғырту мен асхананы жабдықтау және тағы басқа да жұмыстар енгізілген. Бұл жұмыстарды атқару үшін облыстық бюджеттен қаржы бөлінуі қажет. Сенатор Р.Рүстемов ұсыныстардың барлығын облыстық білім басқармасымен бірге зерделеп, зерттеу қажеттігін және лагерь жұмысын жыл бойы жүргізу керектігін айтты.
Ал Н.Ілиясов ауылындағы мектептегі күрделі жөндеу жыл аяғына дейін аяқталуы керек. Бірақ оқу жылы қыркүйек айында басталатынын ескерсек, жоспарлы жұмыстарға өзгеріс енгізуге тура келеді. Сенаторлар әуелі ғимараттың бір жақ бөлігін толық жөндеп, бітіруді, сосын екінші бөлігін жөндеуді ұсынды. Әйтпесе оқу процесіне кедергі келтіруі мүмкін.
– Біз ең алдымен бұл құрылыс жұмысы оқушылар үшін атқарылып жатқанын түсінуіміз керек. Ол үшін қыркүйекте оқушылар мектепке келгенде сынып бөлмелері дайын болғаны дұрыс. Сондықтан құрылыс жұмысын жалпы емес, нақты екіге бөліп атқару керек. Бірінші кезекте бір жақ бөлігін аяқтап, реттестірген жөн. Қалған бөлігі жыл соңына дейін атқарыла береді, – деді Н.Байқадамов.
Осылайша сенаторлар әлеуметтік нысандарды аралап, аудан әкімімен, мәслихат депутаттарымен, қоғамдық кеңес мүшелерімен кездесті. Айтылған ұсыныс-пікірлерді жүзеге асыру бойынша нақты жұмыстар атқарылатынын, Үкіметпен бірге зерделенетінін айтты.
А.ҚҰРМАНАЙТЕГІ