Қарияларға құрмет – ортақ міндет

Өткен аптада «Достық» үйінде аудандық ардагер­лер кеңесінің алқа мәжілісі өтті. Мәжіліске аудан әкімінің орынбасары Д.Байдушев, алқа мүшелері, баста­уыш ардагерлер ұйымдарының жетекшілері қатысты.

Алқа мәжілісіне аудандық ардагерлер кеңесінің төрағасы М.Келдібаев төра­ғалық етіп, күн тәртібіне сәйкес Ақжарма ауылдық ардагерлер ұйымы төрағасының орынбасары Қ.Шмановқа сөз берілді.

Қ.Шманов ауылдық ардагерлер ке­ңесінің ардагерлерді құрмет­теу, ұла­ғаттау, материалдық және мо­раль­дық қолдау, олардың әлеумет­тік жағ­дай­ларын жақсарту бағытында атқа­рылған жұмыстар туралы айтты. Ауылдық округ әкімімен, ауыл­дағы басқа да бастауыш ардагерлер ұйым­дарымен тығыз байланыс орнатылғанын тілге тиек етті. Ауылдық округтегі шаруа­шылықтардың көмегімен өткен жылы ауылдың бір топ ардагерлеріне мате­риалдық көмек көрсетілген екен. Мереке күндері бағалы сыйлықтар жасалып, зейнетке шыққан ардагерлерге сый-сия­паттар да тапсырылған. Сонымен қатар «Сайрам» шипажайына жолдама беріліп, ауыл­ ардагерлері демалып, сауыққаны, «Тіл сақшысы», «Ардагер айнасы» газеттеріне тегін жаздыру ұйымдастырылғаны белгілі болды.

Алдағы уақытта арнайы жабдық­талған ардагерлер бөлмесін жасақтау­ға «Ақжарма және К» шаруашылығы­ның басшысы Қ.Нұрсейітов көмек бе­­ре­тіні, ауыл әкімінің қолдауымен аяқ су мәселесін шешуге 2 насос қондыр­ғы­сы алынғандығы баяндалды.

Өз кезегінде Шаған ауылдық ардагерлер ке­ңе­сінің төрағасы А.Атақаев ауыл­дағы қоғамдық-саяси ахуалдың тұрақ­ты­ғын, шаруашылық тиісті мате­риал­дық қолдау көрсету іс-шарала­рын жүргізіп отырғандығын, халықты ауызбір­ші­лік­ке шақыруда ардагерлер­дің үлесі зор екендігіне тоқталды.

Ал Н.Ілиясов ауылдық ардагерлері кеңесінің төрғасы Т.Жұмабеков өз сө­­зінде ауылда 2009 жылдан бері ауылдық ардагерлер кеңесі тұрақты түр­­де жұмыс жасап келе жатқанын айтты. Бірнеше рет озат тәжірибені тарату мақсатында республикалық, облыстық семинар-кеңес өткізілгеніне тоқталды. Ауылда инвестормен тығыз байланыс орнатылғанын, ардагерлерді соңғы са­­парға шығарып салу, халықтың бір­лігін, ел тыныштығын сақтау, бата беру секілді іс-шараларға ұйытқы болу мақсатында жұмыс одан әрі жалғасу керек деген пікірін жеткізді.

Ардагерлердің алқа мәжілісінде ау­дандық әйелдер кеңесінің төрайымы Ұ.Жанәлиева ауылдық ардагерлер ке­ңесінің атқарған жұмысына оң ба­ға беріп, ұсынысын білдірді. Яғни түрлі қоғамдық ұйымдардың басы қосы­латын осы «Достық» үйіне күрделі жөн­­деу жұмысы жүргізілуі керектігіне және айналасын көгалдандыру, аяқ су мә­селесіне ықпал етуді сұрады.

Жиын соңында аудан әкімінің орын­басары Д.Байдушев елімізде өт­кен сая­си науқанда халықтың ауыз­біршілік көр­сеткеніне, ардагерлер ел азаматтарына батасын беріп, қол­дау жасағанына ризашылық біл­дірді. Сондай-ақ ауданда «Құрмет пен қо­шеметтен тыс қалған ардагер болмасын» деген пікірдің орынды екеніне тоқталды. Ұсыныс ретінде алқа мәжі­лісін өткізу форматын өзгертіп, күн тәртібінде қаралатын мәселеге байланысты тиісті жауапты лауазымды тұл­ғалардың, ауыл әкімдері, мекеме, шаруашылық басшылары, мектеп ди­рек­торларының қаты­суымен мәселені талқылау қажет­тігін айтты.

Мәжіліс соңында қасиетті Рамазан айында ақ тілектер қабыл болсын деген ниетпен ақсақал Т.Жұмабеков батасын берді.

«ТТ» ақпарат