Есепті мерзімде 13 адамға қатысты 11 қылмыстық іс қаралған
Бүгінде сот саласында сан түрлі елеулі өзгеріс орын алуда. Әкімшілік, қылмыстық, азаматтық істің көпшілігі қайта өзгеріске ұшырауда. Адам өміріне тікелей қатысы бар сот шешімі әділ және лайықты түрде шығарылғаны дұрыс. Күнделікті өмірде көптеген мәселемен бетпе-бет келетін Сырдария аудандық сотының төрағасы Руслан Алдамбергенов 2024 жылдың 1-тоқсанының қорытындысы бойынша баспасөз конференциясын өткізді. Іс-шараға Сырдария аудандық қоғамдық даму бөлімінің бас маманы Сәуле Сыздықова қатысты.Бірнеше БАҚ өкілінің қатысуымен жүзеге асқан баспасөз конференциясы барысында Сырдария аудандық сотының төрағасыРуслан Алдамбергенов мерзімді уақытта атқарылған жұмыстарды саралады.
– Статистикалық мәліметтерге қарағанда есепті кезеңде 10 қылмыстық іс 12 адамға қатысты түсіп, өткен жылдан 1 іс қалдыққа қалған. 13 адамға қатысты 11 қылмыстық іс қаралып, оның ішінде 9 адамға қатысты 8 іс бойынша үкім шығарылған. Ал 1 адамға қатысты 1 іс тоқтатылып, 1 іс соттылығы бойынша жолданған. Өткен жылмен салыстырғанда түскен қылмыстық істердің саны – 3, яғни 23 пайызға, қаралған істердің саны – 3 іске, яки 21 пайызға азайған. Жалпы 77 азаматтық іс қаралып, оның ішінде, 7 іс бойынша сот бұйрығы шыққан. Сонымен қатар 27 шешім қабылданып, 35 іс өндірістен тоқтатылған. 8 іс қараусыз қалдырылып отыр. Өткен жылмен салыстырғанда түскен талап қоюлар мен істердің саны 10-ға, яғни 9,5 пайызға қаралған істердің саны 13 іске, демек 20 пайызға көбейген. Есепті мерзімде соттың өндірісіне 89 әкімшілік құқық-бұзушылық туралы іс түсіп, 5 іс өткен жылдан қалдыққа қалған. Түскен әкімшілік құқық-бұзушылық туралы істердің ішінде 92 адамға сонша іс қаралған. 68 адамға әкімшілік жаза қолданылып, 24 адамға қатысты тоқтатылған. 5 жекеше қаулы қабылданған, – дейді сот төрағасы.
Қолдағы мәліметке сүйенсек, өткен жылмен салыстырған кейбір істерді қарау көбейсе, басқа санаттағылар төмендеген. Мәфселен, өткен жылмен салыстырғанда түскен әкімшілік құқық-бұзушылық туралы істердің саны 36-ға артып, 68 пайызды құраған. Қаралған істердің саны 40 іске жетіп, 77 пайызды көрсеткен. 2024 жылдың 1-тоқсанында барлығы партисипативтік рәсім тәртібімен 1 азаматтық іс, медиаторлардың қатысуымен 35 азаматтық іс, 16 әкімшілік құқық-бұзушылық туралы іс, 1 қылмыстық іс медиация тәртібімен аяқталған. Сотқа келіп түскен істер 100 пайыз аудио-бейне жазба арқылы қаралған. Есепті мерзімде әкімшілік құқық-бұзушылық туралы және қылмыстық істердің барлығы электронды нұсқада қабылданған.
– Біз қашанда ашықтық қағидатын ұстанамыз. Әрбір істің артында адам өміріне қатысты мәселенің жауапкершілігі тұр. Осы уақытта зорлық-зомбылыққа байланысты Заң қайта күшіне енуде. Алдағы уақытта нәзік жанды мен балаға зәбір көрсеткен жандар қатаң жазадан құтылып кете алмайды. Ерлі-зайыпты арасында орын алатын түсініспеушілік салдары үлкен дау-жанжалға ұласуда. Күнделікті ұрлық қылмыстарын, әкімшілік құқық-бұзушылық,азаматтық істердің әрбір бабы бойынша жауапкершілікке тартылған азаматтардың өміріне бей-қам қарамай, дұрыс шешім қабылдауға тырысамыз, – деді Руслан Алдамбергенов.
Баспасөз мәжілісін қорытындылаған сот төрағасы Р.Алдамбергенов көтерілген бірқатар мәселе бойынша БАҚ өкілдерінің сұрақтарына жауап берді.
Балтабай ОРДАБЕКОВ
