Бүгін Сырдария ауданына қарасты Айдарлы ауылдық Ғафурдин Жанұзақов атындағы ауылдық клуб үйі ұжымының ұйымдастыруымен жергілікті халық дәстүр сабақтастығының көрініс табуын тамашалады. Яғни, 16 наурыз – Мәдениет және ұлттық салт-дәстүр күні аясында «Халық дәстүрі – асыл қазына» тақырыбында жүзеге асқан іс-шарада кішкентай бүрдіршін Асфендияр Ермекбайұлының тұсауы кесілді. Өз кезегінде Айдарлы ауылдық амбулоториясының дәрігері Ерболат Орынбасарұлы балғынның тұсауын кесіп, үлкен азамат болуына зор тілектестігін білдірді.

Шын мәнінде, Ұлыстың ұлы күні – Наурыз мерекесі қарсаңында айдарлылықтар әрбір күнді ерекше етіп атап өтуде. Нағыз қаймағы бұзылмаған, берекесі тасыған ауылдың халқы қашанда салт-дәстүрге берік келеді. Ата-бабаның ізгілікті жолымен жаңғыру мен жаңару мекересінде ауылдағы жұртшылық бір-біріне ақжарма тілектерін жеткізіп, амандық-саулық сұрасты. Сонымен қатар мәдениет майталмандары өнер көрсетіп, көпшілікке шад-шадыман көңіл-күй сыйлады.