Іс-шаралар жоспары бекітілді
Биыл – аудандық газеттің 85 жылдық мерейтойы. Басылымның айтулы белесіне орай аудандық газет редакциясы тарапынан аудан әкімі Берік Сәрменбаевқа бірқатар ұсыныс жолданған болатын. Аудан басшысы редакция ұсынысын толық қолдап, мерейтойлық іс-шаралардың міндетті түрде өткізілетінін айтқан еді. Бұны аудан жаңалықтарының жаршысы болған төл басылымға деген құрмет деп қабылдадық.
Аудан әкімі газеттің 85 жылдық мерейтойына орай ұйымдастырылатын іс-шараларды пысықтау мақсатында аудандық газеттің бас редакторы Ақтөре Ибрагимұлын қабылдады. Қабылдауда ең алғашқы нөмірі 1939 жылдың 26 наурызында жарыққа шыққан газеттің тарихы, ауданның қоғамдық-саяси өміріне қосқан үлесі мен жетістіктері кеңінен айтылды. Аудан әкімі газеттің әр нөмірін үзбей оқитынын, жарияланып жатқан жаңалықтармен тұрақты түрде танысып отыратынын айтып, төл басылымның бастамаларын қолдайтынын жеткізді.
– Мен салалық орынбасарыма, аудандық қоғамдық даму бөлімінің басшысына, сондай-ақ кент және ауыл әкімдеріне газеттің 85 жылдығына орай мерейтойлық іс-шаралар ұйымдастыруды тапсырамын. Бұл ауданымыздың тарихы үшін аса маңызды. Өйткені жергілікті газет жарыққа шыққан алғашқы нөмірінен бастап ауданның тарихын, жетістіктерін, атқарылып жатқан жұмыстарды насихаттап келеді. Былтыр аталып өтілген ауданның 95 жылдық мерейтойында да аудандық газет ақпараттық қолдау көрсетті. Сондықтан жергілікті басылым ұжымы «Жыл үздігі» аталымы бойынша үздік ұжым атанды. Бұл бәріміз бірлесе атқарған жемісті жұмыстарымыздың нәтижесі. Алдағы уақытта да Президентіміздің саяси реформаларының мәні мен маңызын халыққа түсіндіріп, аймақ басшысының қолдауымен жүргізіліп жатқан жұмыстар баспасөз арқылы насихатталады деп сенемін, – деді Берік Сәрменбаев.
Өз кезегінде аудандық газеттің бас редакторы Ақтөре Ибрагимұлы басылымның 85 жылдығына орай ғылыми-практикалық конференция ұйымдастыру мен ауданның тарихы мен жетістіктері топтастырылған кітаптың тұсаукесерін өткізуді ұсынды.
Сондай-ақ аудандық жазба ақындар мүшәйрасы, шығармалар байқауы, тақырыптық кездесулер мен қабылдаулар ұйымдастырылғаны дұрыс екенін айтты.
Қабылдаудан кейін, яғни 2024 жылғы 21 ақпанда аудан әкімінің орынбасары Д.Байдушев мерейтойлық іс-шаралардың жоспарын бекітті. Аудан әкімінің тапсырмасы бойынша бекітілген жоспар негізгі тоғыз тармақтан тұрады. Жоспарда кент және ауылдық округтерде газеттің 85 жылдық тарихи мерейтойын айшықтайтын билборд орнатудан бастап, «Тіршілік тынысы» – жаңалық жаршысы» тақырыбындағы жазба ақындар мүшәйрасы ұйымдастырылатыны көрініс тапқан. Мұнан бөлек аудан тұрғындары арасында «Төл басылымның тұрақты оқырманымын» тақырыбында шығармалар байқауы өткізілмек. Ал ғылыми-практикалық конференцияның тақырыбы «Аудандық газет: аудан тарихының, жетістігінің шежіресі» деп аталмақ. Конференция аясында ауданның тарихы мен жетістіктері топтастырылған, аудандық газеттің 85 жылдық тарихы жазылған кітаптың тұсаукесер рәсімі өткізіледі деп жоспарлануда. Айта кету керек, іс-шаралар жоспарында аудандық газеттің ардагерлері мен қызметкерлерін мерекелік қабылдау, олардың білім беру ұйымдарында кездесуін өткізу де назардан тыс қалмаған. Қорыта айтқанда, төл басылымның мерейтойы жыл көлемінде аталып өтілетін болады.
«Тт» ақпарат