Тіршілік тынысы Tirshilik-tynysy.kz ақпараттық агенттігі
» » Ұлттық тәрбие – сапалы білім тұғыры

Ұлттық тәрбие – сапалы білім тұғыры

Ұлы ғұлама Әбу Насыр әл-Фараби «Адамға ең әуелі білім емес, тәрбие берілуі керек. Онсыз берілген білім – адамзаттың қас жауы» деген. Ұлттық дәстүрімізбен сусындаған ұрпақ бойына мейірімділік, ақжарқын көңіл мен кеңпейілділік, қонақжайылылық қасиетін сіңіреді. Жақында №36 Ә.Тәжібаев атындағы мектеп-лицейде «Ұлттық тәрбие – сапалы білім тұғыры» тақырыбында облыстық семинар өтті. Семинарға аудандық мәслихат депутаттары Алмас Есназар, Ақтөре Ибрагимұлы, облыстық тәрбие, спорт және қосымша білім беру орталығының директоры Фархат Досаев, аудандық білім бөлімінің басшысы Берік Жәнібеков, облыс, аудан мектептерінен келген тәрбие ісі жөніндегі орынбасарлары мен психологтар қатысты.

Ұлттық құндылықтарға негізделген тәрбие үдерісіндегі инновацияны білім мен тәрбие беру жұмысына енгізу, жалпыадамзаттық құнды­лықты дамытуға бағыттаудың тиімді әдіс-тәсілі бойынша тәжірибе алмасуды мақ­сат еткен семинарға қатысушылар арнайы көрме­ні тамашалады. Мектеп-лицей фоесінде ұйымдастырылған көрмеге қолөнер бұйымдары қойыл­ған. Сонымен қатар бесасық, асық ату, тоғыз­құмалақ секілді ұлттық ойындардың таныстырылымы өтті.


«Отбасы құндылығы – ұлт болашағының негізі» бөлімінде мектеп-лицей ұстаздары әжелер мектебінің, әкелер мектебінің, «Инабат» қыздар ұйымының жұмысын және үздік сынып сағатын көрсетті. «Құндылықтар­ға негізделген білім – білім мен тәрбие сабақтастығының негізгі көрсеткіші» бөлімін­де пән мұғалімдері үздік ашық сабақ, интег­рациялық сабақ және жас мұғалімдердің қатысуымен коучинг сабақ өткізілді. Сондай-ақ «Ұлттық құндылықтар – тәрбиенің түп қазығы» бөлімінде «Жасыл аймақ» үйірмесінің жұмысы көрсетілді. Жылыжайда өткен сабақ «Еңбегі адал жас өрен» және «Жеткіншектің жеті жарғысы» жобасы негізінде мектеп жанындағы жылыжай-оқушыларға заманауи агро­экобиологиялық білімді баулудың тиім­ді құралы» тақырыбында өтті. Мұнан бас­қа тақырыптық оқу сағаты, ата-аналар ака­демиясының жұмысы бойынша ата-ана мен мектеп мұғалімдерінің топтық дискуссиясы жоғары деңгейде ұйымдастырылды.

Семинардың қорытынды бөлімі мерекелік ұлттық-патриоттық концертке жалғасты. Тәрбие, спорт және қосымша білім беру орталы­ғының директоры Фархат Лиясұлы мен білім бөлімінің басшысы Берік Съездұлы семинардың жоғары деңгейде өтуіне атсалыс­қан, іс-тәжірибесімен бөліскен педагогтерді «Құрмет грамотасымен» марапаттады.


Мектеп-лицейдің өнерлі оқушылары ән айтып, би биледі. Домбырашылар ансамблі керемет күй орындап, «Балапан» шағын орталы­ғының тәрбиеленушілері ән шырқады.

– Жаңа Қазақстан – жастарға үлкен мүмкіндік береді. Бүгінде мектеп-лицейдің жас ұстаздары қоғамның қозғаушы күші ретін­де озық идеяларымен қаруланып, еліміз­дің дамып, өркендеуіне үлес қосу­да. Семинар ұстаз бен шәкірттің жеткен жетістігін үлгі етіп көрсетуге мүмкіндік берді. Ұлттық құндылықтарымызды дәріптеп, асыл мұрамызды насихаттауда ұстаздар қауымы алдағы уақытта да тиімді әдіс-тәсілдерін енгізе беретін болады, – дейді мектеп-лицей директоры Ж.Төреқұлова.

Ауқымды іс-шара «Бұл – Жаңа Қазақстан» атты жас мұғалімдердің орындауындағы пат­риот­­тық әнмен мәресіне жетті.

Б.ТАҢАТАРҚЫЗЫ
24 ақпан 2024 ж. 156 0