«Үздік тілші» атанды
Береке мен молшылық мерекесі «Алтын дән – 2023» іс шарасында біздің әріптесіміз Бибісара Жанәлі «Үздік газет тілшісі» аталымымен марапатталып, озаттар қатарынан көрінді. Мерекелік марапатты аудан әкімінің міндетін атқарушы Д.Байдушев молшылық мерекесіне орай ұйымдастырылған жиында табыстады. Жыл бойына дала даңғайырларының адал еңбегін насихаттауға үлес қосып, еңбек адамдарын көпшілікке насихаттауда жүйелі еңбек еткен әріптесіміздің мерейі артты.Аудан еңбеккерлері биылғы науқанды абыроймен аяқтап, қамба астыққа толды. Алты Алашқа ана болған Сыр өңірінің облыс болып құрылғанына 85 жыл және Сырдария ауданының құрылғанына 95 жыл толған атаулы жыл диқандар үшін де табысты болды.
Еңбек адамының еңбегін бағалап, мерейін арттыру мақсатында ұйымдастырылған «Алтын дән – 2023» мерекелік іс-шарасына дала еңбеккерлерімен қатар құрметті қонақтар мен аудан тұрғындары қатысты. Алажаздай еңбек етіп, күн мен түнге, ыстық пен суыққа қарамай еңбек даласынан табыла білген азаматтар марапат биігінен көрінді.
Еңбек адамдарының еселі еңбегін насихаттау мен еңбек даласындағы жай-күйді ақпараттандырып, халыққа уақытылы жеткізіп отыру да үлкен жауапкершілікті талап етеді. Айта кетейік, әріптесіміз Бибісара Таңатарқызы қай бағытта қалам тербемесін, кестелі сөз орамын келісті келтіріп, ой жүйелілігіне баса мән береді. Бүгінге 30 жылға жуық еңбек өтілі бар журналист – жазудың қыры мен сырына қанық. Ойы ұшқыр әріптесіміздің қаламынан осы күнге дейін жағымды жаңалық пен жақсы ойлар төгіліп келеді. Қаламы жүйрік тілшінің 2003 жылдан бері Қазақстан Журналистер Одағының мүшесі екенін де айта кеткеніміз орынды.
Ахмет Байтұрсынұлы «Газет – халықтың көзі, құлағы һәм тілі» деп газет-журналдың халық өмірінде атқаратын рөліне баса мән берсе, жазушы Шерхан Мұртаза «Журналистің жегені – жантақ, арқалағаны – алтын» деп тілшілік қызметтің қызығы мен қиындығы қатар жүретініне тоқталады. Осы ретте тоқшылық мерекесінде абырой биігінен көрінген әріптесімізді лайықты марапатымен шын жүректен құттықтаймыз! Ортақ абырой жолында үлкен еңбектің үлгісін көрсеткен әріптесімізге шығармашылық табыс тілеп, еңбегіңіз жемісті болсын демекпіз!
«Тт» ақпарат
