Тереңөзекті бірге көркейтейік

Тереңөзек кентінің тумасы және кенттің әкімі ретінде бүгін тұрғындарға ой тас­тап, тазалық мәдениетін қалыптастыруға, қоршаған ортаны абаттандыруға, сондай-ақ сенбіліктерге тұрақты түрде қатысуға байланысты пікір білдіргім келеді. Менің ойымды кент тұрғындары қолдайды және Тереңөзекті бірге көркейтуге атсалысады деп сенемін.

Өздеріңізге белгілі, күз айы да келіп жетті. Бұл кезең – көр­кей­ту-көгал­дан­дыру жұмыстарын ұйымдастыратын тамаша уақыт. Сондықтан апта сайын ұйым­дастырылатын сенбіліктер барысында ғана емес, күнделікті қоғам тазалығын бас­ты назарда ұстағанымыз дұрыс.

Тазалық жай ғана жүрдім-бардым қарайтын дүние емес. Мұнда үлкен тәрбие негізі, мә­дениет­тілік бар. Себебі, тазалық – адамның рухани, мәдени жетілу деңгейінің, кісілігі мен тәрбиесінің маңызды көрсеткішінің бірі. Ол жан-жақты адам өмірін, болашағын, имандылығы мен адамгершілік сияқты кісі ғұмырына тән көптеген тармақтарды қамтиды. Дана бабаларымыз адам өмірінің зор байлығы – денсаулық десе, ал денсаулықтың кепілі – та­залық екенін ұғындырған. Сондықтан тазалық – адамның мәдениеттілігінің, адамгершілігінің таразысы, иманның жартысы саналады.

Біз көше мәдениетін қозғағанда ең алдымен тазалықты сөз ететініміз анық. Өйткені, көшедегі мәдениеттіліктің бас­тауы тазалық екені айтпаса да түсінікті. Әрбір адам өзінің көшесін, ауласын таза ұстау арқылы қоғамға пайдасын тигізеді. Ал қоршаған орта күл-қоқысқа толып жатса, оның адам денсаулығына тигізер зия­­ны көп. Сол себепті де тұрғындар айнала­ны ластамай, біреудің ай­т­уымен емес, өз­дерінің денсаулықтары үшін са­нитарлық та­за­­лыққа мән беріп қарағаны жөн.

Жыл сайын көктемгі және күзгі уақытта екі айлық тазалық айлығы жүргізіледі. Облыс, аудан көлемінде уақыты бекітіліп, сол бойынша сен­біліктер ұйымдастырылады. Тиісінше, осы мез­­гілде де аудан төңірегінде тазалық айлығы жал­­ғасуда. Соның нәтижесінде, біраз көшенің бойы, алаңдар, аллеялар тазартылып жатыр. Десе де қазіргідей күз мезгілінде жауапкершілікті сезінбеген кейбір тұр­ғын­дардың тұрмыстық қал­дықты бей-берекет ша­шып тастауынан көше бо­йында сани­тарлық та­за­лық талаптары сақтал­мау­да. Бұл бағытта аудандық полиция бөлімімен тиісті жұмыстар жүргізіліп, тазалық сақтамағандарға айыппұлдар салынуда. Сонымен қатар, малдарын қараусыз жіберген кейбір тұрғындардың ке­сірінен қоғам тазалығына нұқсан келуде. Төрт-түлік малдың қараусыз жүруі көшелерді ғана емес, тарихи маңызы зор рухани-мәдени орындарды да лас­тауда. Бұл – дұрыс емес және мал ие­лері жауапкершілікпен қарауы қажет деп есептейміз.

Осы тұста, әр азамат өзінің есік алдын, көше жақ бетін тазартып, күл-қоқысты далаға шығармай, өзі тұрып жатқан аумақты таза ұс­таса, оның қоғамға тигізер пайдасы көп. Яғни әрбір адам көше тазалығына жауап берсе, кенттің де келбеті айшықтала түсетіні анық. Сондықтан кент тұрғындарын көше тазалығын сақтауға, таза­лық акцияларына, оның ішінде респуб­лика бойынша ұйымдастырылып жатқан «Таза Қазақстан» акциясына белсене қа­тысып, Тереңөзек кентінің тазалығын сақтауға бір кісідей қатысуға шақырамыз. Туған жеріміз, өсіп-өнген киелі мекеніміз Тереңөзекті бірге көркейтейік, жерлестер!

Ержан БАХТИЯРОВ,
Тереңөзек кентінің әкімі