«Алтын тобылғы» әдеби байқауы жарияланды

«Алтын тобылғы» әдеби байқауы үздік жас ақындар мен жазушыларды анықтайды. Бұл игі іс-шараны Нұрсұлтан Назарбаев Қоры ұйымдастырып отыр. Дәстүрлі байқау биыл тоғызыншы рет өтеді. Басты мақсат – заманауи қазақстандық көркем әдебиетті дамыту, жас қаламгерлерді қолдау, шығармашылығын насихаттау, деп хабарлайды Egemen.kz.

Әдеби байқауға 18-35 жас аралығындағы жас қаламгердің қазақ немесе орыс тілдеріндегі шығармасы қабылданады. Автор екі номинацияға қатысуға құқылы. Байқаудың бұрынғы жеңімпаздары қатыстырылмайды. Бір автордан бұрын-соңды еш жерде жарияланбаған екі шығармаға дейін қабылданады.

Байқау номинациялары:

- «Жылдың үздік прозасы»;

- «Жылдың үздік поэзиясы»;

- «Жылдың үздік драматургиясы»;

- «Жылдың балаларға арналған үздік шығармасы»;

- «Жылдың үздік киносценарийі»;

- «Жылдың үздік фантастикалық шығармасы»;

Қор биыл ««Жаңа Қазақстанның жасампаз ұрпағы» тақырыбына арналған үздік әдеби туынды» арнайы номинациясын да тағайындаған. Жеңімпаз «Алтын тобылғы» әдеби сыйлығының лауреаты атанып, 2 млн теңге көлемінде ақшалай сыйлық алады. Ал арнайы номинация жеңімпазына 3 млн теңге беріледі.

Қатысу үшін өтінімді (шығарманы) пошта арқылы Астана қаласы, Ә.Бөкейхан көшесі, 1А, Нұрсұлтан Назарбаев Қорына немесе at2022@fnn.kz электрондық мекенжайына жіберу керек. Өтінім 30 қазанға дейін қабылданады.

Толық ақпаратты fnn.kz сайтынан немесе 8 (7212) 767012 телефон нөмірі арқылы білуге болады.