Әр нөмірін асыға күтеміз

Аудандық газеттің өткен нөмірінен аудан әкімі Берік Әбдіғаппарұлының «Жергілікті газет – жаңалық жаршысы» тақырыбындағы пікірін оқыдым. Аудан­ басшысының орнықты ойы мен пайымды пікірін оқы­ғаннан кейін қолға қалам алып, баспасөзге жазылу науқанына қолдау көрсетуді жөн санадым.

Облыстық «Сыр бойы», аудандық «Тір­шілік тынысы» газетінің тұрақты оқыр­маны болғаныма жарты ғасыр­дан астам уақыт өтті. Бүгінде жасым тоқ­сан­нан асса да мерзімді басылымдардың әр нөмірін асыға күтемін. Газет халыққа тарайтын күні «бүгін газетте не жазылды екен» деп елеңдеп, мақалаларды оқы­ғанша асығамын.

Газетті оқу – зиялылықтың, пара­сат­тылықтың белгісі. Ұлт ұстазы Ахмет Байтұрсынұлының «Газет — халықтың көзі, құлағы һәм тілі» деген сөзі әлі күнге өзектілігін жойған жоқ. Қазіргі таңда ақпарат алмасудың заманауи тәсіл­дері де көп екен. Қазір айтылған ақ­парат көзді ашып-жұмғанша сол ме­зетте-ақ ғаламтор, түрлі сайттар мен әлеу­меттік желілер арқылы әлемге тарап жатады деп естиміз. Бірақ газет оқу мәдениеті – қашанда талғамы жоғары оқыр­манның талабы. Газеттен біз шынайы ақпаратты, байыпты сараптаманы, нақты тұжырымды және тереңнен зерттелген таңбаланған тарихты табамыз. Желдей ескен әлеуметтік желілерден газетті айрықшалап тұратын негізгі ба­­сым­дық – осы. Газетке басылатын сөз­дің мағынасы зор, ықпалы ерекше. Ел аза­маттарының ізгі істері, қоғамдағы өзекті мәселелер жайын газет бетінен та­буға болады.

Ауданның тарихымен біте қайнасып, халыққа қызмет көрсетіп келе жатқан аудандық «Тіршілік тынысы» газетін бүгінде сырдариялықтар үзбей оқиды. Газет бетінде жаңалықтардан бөлек, ауданымыздың тарихына байланыс­ты мақалалар, белгілі тұлғалар туралы материалдар үздіксіз жариялануда. Ал басылымның ұзақ жылдардан бері ұс­таздардың рухани дүниесін кеңейтіп, шы­ғармашылығын шыңдап, білім сала­сындағы жаңашылдықтардан хабардар­ болып отыруына қосқан үлесі, тіпті ора­сан. Сондықтан бәсекеге қабілетті және ұлттық құндылықтарды бойына сіңір­ген жас ұрпақты тәрбиелеуге мүд­делі әрі оқу үдерісіндегі заманауи жаңа­лықтарды білуге ұмтылатын кез келген ұстаз алдымен жаңалықтардан тыс қалмай, мерзімді басылымдарды оқуы ке­рек.

Баспасөзге жазылу – ерікті түрде атқарылатын шаруа болғанымен, бұл әр­кімнің біліміне, парасаттылығына, тәр­бие­сіне байланысты нәрсе. Бүгін оқыр­манды газетпен емес, газетті оқырман­мен қамтамасыз ету қажеттілігі туған кезеңде сенімді әрі шынайы ақпарат ал­ғысы келген, елінің ғана емес, өзінің де тағдырына бей-жай қарай алмаған кез келген азаматтың газетке жазылудан қа­лыс қалмайтыны анық. Өзім өмірді бір кісідей көрген, ұзақ жылдар оқу-ағарту саласында еңбек еткен адам ретінде газетке жазыламын. Жаңалықтарды газет ар­қылы оқу өмірімнің айнымас бөлігі деп білемін.

Рақымжан қажы Бәйменов,
ардагер ұстаз,
Сырдария ауданының
Құрметті азаматы