Жұмысты жандандыруды тапсырды

Аптаның бейсенбісінде аудан әкімі М.Ергешбаевтың төрағалығымен аппарат­ мәжілісі өткізіліп, күн тәрті­бінде негізгі екі мәселе тал­қыланды. Аудан басшысы жылдың екінші айының аяқталуға жақын қалғанын айтып, бірінші тоқсан қоры­тындысы бойынша белгі­ленген жоспарлардың ма­ңыздылығына тоқталды.

Мәжілісте талқыланған бірінші мәселе бойынша аудандық қоғамдық даму бөлі­мінің басшысы Б.Смайлов хабарлама жасады. Аудандағы қоғамдық-саяси ахуал жә­не ауданның оң имиджін қалыптастыру бағытында жүргізілген жұмыстарды жария еткен бөлім басшысы талдау қорытынды­сына кеңінен тоқталды.
– Қазіргі таңда ауданның қоғамдық-саяси ахуалы тұрақты негізде сипатталады. Жыл басынан бері наразылық тудыратын, көңіл толмаушылық танытуға ниет білдірген митинг, пикетті аудан көлемінде өткізу туралы өтініштер тіркелген жоқ. Ау­дандық қоғамдық даму бөлімімен аудан көлеміндегі қоғамдық-саяси ахуал­ға күнделікті зерделеу жұмыстары жүргізі­луде. «Қызылорда облысының ықтимал әлеуметтік шиеленіс ошақтары картасына» сәйкес жер және апатты тұрғын үйлер мәселесі бақылауға алынған. Мә­селе көтерілуі мүмкін жағдайлар бойынша түсіндірмелер жүргізілді. Аудандағы қо­ғамдық-саяси ахуал бойынша «Регион­ Юг-Запад» қоғамдық бірлестігі арқылы әлеуметтік сауалнама былтыр төрт рет жүргізілді. Нәтижесінде кешенді зерттеуді талап ететін өзекті мәселелер бар екені анықталды. Оның ішінде денсаулық сақ­тау саласына көңіл толмаушылық, жұмыс­сыз­дық, азық-түлік пен киім бағасының ­­өсуі, несие төлеу проблемасы бар. Көтерілген мәселелер бойынша тиісті сала басшыларына, кент және ауыл әкімдеріне сауалнама қорытындысы жолданды. Сондай-ақ қоғамдық-саяси ахуалды тұрақтандыру және әлеуметтік-экономикалық салаларда дағдарыс жағдайлар туындағанда азаматтармен келіссөз жүргізуші жұмысшы то­бының алгоритмі бекітілді. Алгоритм бо­йынша арнайы жұмысшы топ құрылып, жедел әрекет ету бойынша тиісті салалардың іс-әрекеті белгіленді, – деген бөлім басшысы іс-әрекеттер жоспары құқық қорғау органдарына да таратылғанын айтты.

Аудан басшысы М.Ергешбаев қоғам­дық-саяси ахуалды тұрақтандыру бо­йынша бірқатар тапсырмалар беріп, ауданда атқарылып жатқан жұмыстарды на­си­хаттауды тапсырды. Оның ішінде рес­публикалық телеарналар мен басылым­дармен әріптестік байланыс орнату қажет­тігіне ерекше тоқталды. Сонымен қатар ауданның төл басылымы «Тіршілік тынысы» газетінің ақпараттандыру жұмыстарын жоғары бағалады.

Келесі мәселе дене шынықтыру және спорт саласын дамытудың негізгі көрсет­кішіне арналды. Бұл бойынша аудандық мәдениет және спорт бөлімінің басшысы Ж.Айекешов баяндама жасады.

– Біздің негізгі міндетіміз – спортпен шұғылданушылар санын ұлғайту. Бүгінде аудан бойынша 14 702 спортшы, яғни халықтың 38 пайызы жүйелі түрде спортпен айналысуда. Жастардың спортпен шұғылдануы үшін бірінші кезекте спорт нысандары халыққа қолжетімді болуы тиіс. Мәселен, қазіргі таңда ауданымызда 2 стадион, 5 спорт кешені, 30 спорт залы, 22 жапсарлас спорт залы, 1 тир және спорттық алаңдар жұмыс жасауда. Аудандағы барлық дене шынықтыру және спорт нысандарының саны 134-ді құрайды. 2009 жылдан бастап облыста бұқаралық спортты дамыту мақсатында мемлекеттік әлеуметтік тапсырыс арқылы спорт нұс­қаушыларын қаржыландыру тәжірибесі енгізілген болатын. Нәтижесінде жалпы білім беру және спорт мектептерінің спорт залдарында оқу үдерісінен тыс уақытта елді мекен тұрғындары бекітілген спорт нұсқаушылары арқылы дене шынықтыру және спортпен шұғылданады. Осындай жұмыстардың арқасында жетістіктер көп.Аудан спорт­шылары былтыр ҚР чемпионатынан 56, Азия чемпионатынан 6, Әлем чемпионатынан 4 медаль жеңіп алды. Ауданда І разрядты 96 спортшы және 267 спорт шеберлігіне үміткер, 25 спорт шебері, 9 халықаралық дәрежедегі спорт шебері бар. Өткен жылы ауданда барлығы 107 жарыс өткізілді, – деген бөлім басшысы бұқаралық спортты дамытумен қатар бәсекеге қабілетті, біліктілігі жоғары спортшыларды әзірлеу жұмыстарына басымдық берілетінін айтты.

Аудан басшысы мемлекеттік әлеуметтік тапсырыс шеңберінде атқарылатын жұмыс­тарды жандандыру, мектепте оқитын балалар мен жасөспірімдер арасында футбол лигасын жоғары деңгейде ұйымдастыру, спорт жұлдыздарының қатысуымен ауданда мотивациялық кездесу өткізу, облыстық ауыл спортшыларының «Алтын күз» спартакиадасына тыңғылықты дайындалу ба­ғы­тында нақты тапсырмалар берді.

Ақтөре ИБРАГИМҰЛЫ