Медициналық мекемелер жаңарады

Қазір халық арасында аурушаңдық басым. Сондықтан медицина қызметкерлеріне халық денсаулығын жақсартуда зор жауапкершілік жүк­теледі. Ал халыққа сапалы медициналық қызмет көрсету үшін медициналық мекемелердің де талапқа сай болғаны жөн. Ауданға қарасты елді мекендерде тұрғындар фельдшерлік бекеттер, жергілікті емдеу мекемелеріне барады. Олардың қатарында жөндеуді қажет ­ететін­дері бар.

Атқарушы билікпен есепті кездесуде бірқатар ауыл халқы ең алдымен денсаулық сақтау саласына байланыс­ты мәселе кө­теріп, оның ішінде емдеу орындарын талапқа сай жаңартуды, жаңғыртуды айтады. Бұл мәселе аудан орталығына жақын орналасқан А.Тоқмағамбетов пен Қалжан ахун ауылдарына тікелей қа­тысты. Себебі елді мекендердегі ме­ди­циналық мекеме­лердің жағдайы бү­гін­­де талапқа сай кел­­мейді.

Ақиық ақын Асқар ауылындағы дә­рігерлік емхана егемендік алған жылдары, нақтысын айтқанда 1994 жылы типтік жобада салынған. Отыз жылға жуық уақыт ішінде ағымдағы жөндеу­ден өткізіліп отырған, десе де қазір күрделі жөндеуге сұранып тұр. Негізі ауыл хал­қы жиындарда жаңадан ме­ди­циналық мекеме салып беруге ұсы­ныс айтқан.

– Дәрігерлік емхана 2008 жылы ағымдағы жөндеуден өтті. Одан кейінгі уақытта да қолымыздан келгенше күтіп ұстап келеміз. Мұнда 5 орындық күндіз­гі стационар, дәрігерге дейінгі кабинет, қабылдау бөлмесі, акушерлік бөлме бар. Осы мекемеде 10 қызметкер жұмыс істейді. Біз халыққа ем-дом шараларын жасап, денсаулықты жақсартуға тиісті жұмыстарды атқарып келеміз. Тек халыққа қызмет көрсетуде ғимарат талаптарға сай болса екен, – дейді ауылдағы жалпы тәжірибелік дәрігер Гүлжан Абдирова.

Басы ауырып, балтыры сыздаған ха­лық дереу дәрігер көмегіне жүгінері анық. Аудан орталығына жақын деге­німен, елді мекен тұрғындары алдымен ауылдағы дәрігерлік емханаға баратыны белгілі. Ондағы медицина қыз­меткерлері қажетті ем-дом жасайтыны да анық. Тек ғимараттың іші қан жылым ғана болып, ем қабылдауға келгендер өзін жайсыз сезінсе, оның кері әсер ететіні айқын. Сондықтан да ауыл халқы медициналық мекеменің биыл күрделі жөндеуден өтетініне бек қуанышты.

Қалжан ахун ауылындағы фельд­шер­лік акушерлік бекет те осы жылы күрделі жөндеуден өткізілмекші. Бұл мекеменің фельдшерлік акушерлік бекет ретінде қолданысқа берілгеніне 11 жыл болған. Десе де қазір ғимарат құрсаумен құрсауланған.

– Ауыл халқына медициналық қыз­мет көрсетіп келеміз. Өткен жылы бізге 2469 адам қабылдауға келіп, 1236 адам ем-дом шарасын қабылдады. Мұнда 5 қызметкер жұмыс істейміз. Меди­ци­налық қызмет көрсетуге бөл­мелер қа­рас­тырылған. Дегенмен қабыр­ғалар сө­гіліп тұр, – дейді фельдшер Жанат Жұмаділова.

Ауылдағы медициналық мекемелер­ді жаңарту биылға жоспарланған. Бұл жұмыстар сапалы іске асса, халық ден­саулығын жақсартуға, аурушаң­дық­ты азайтуға мүмкіндік жасалмақ.

Е.БЕРКІНБАЕВ