Шалғай ауылдағы тың кәсіп

Ауданнан шалғайда жатқан Іңкәрдария ауылында кәсібін бастап, бизнесті табыстың көзіне ай­налдырғандар саны күн санап артып келеді. Тұрғындардың көбісі ата кәсіп мал шаруашылығы және егін шаруашылығымен айналысса, өзге де кәсіптің көзін тапқандар қатары толығуда. Жақын­да ауыл тұрғыны Жанат Құлмырза елді мекен орталығынан «Желімдеу» орта­лығын ашты.

Орталықтың ашылу рәсіміне ауыл тұр­ғындары жиналып, кәсіп иесіне ақ тілек­терін арнады.

– Ауыл тұрғындары кәсіптің жаңа түрін бастап, халыққа қажетті қызмет түрін ашып жатқанына қуаныштымыз. Қазір ауылдың жағ­дайы күннен-күнге жақсарып келе жатыр. Аудан орталығы мен облыс орталығын жалғап жатқан тақтайдай түзу жолдың өзі үлкен көмек. Жол қатынасы жақсарған сайын тұрғындар да сан алуан техниканы тізгіндеп, күнкөріс қа­мын жасауда. Бүгін қолынан іс келетін азамат Жанат Құлмырза жаңа орталықты ашты. Шағын болса да оның қызметін пайдаланушылар, күнделікті келетіндердің саны көп. Бұл сұраныс болған жерде табыс та болады деген сөз. Себебі, техника болған соң дөңгелегінің жағдайын бақылап тұру керек. Міне, осындайда әмбебап маман көмекке келеді. Кәсібіне береке берсін. Екі қолға бір жұмыс таба алмай жүрген жастар үлгі алса дейміз. Мемлекет тарапынан тың идея ұсынғандарға қай­­та­рымсыз несие де беріледі. Бұл жақсы бас­таманы пайдаланып, ауылдың дамуына әрі өзін-өзі жұмыспен қамтуға, отбасын асырауға үлкен мүмкіндік, – дейді ауылдық ардагерлер кеңесінің төрағасы Әбдіразақ Байманов.

Орта жастан асқан кәсіпкер – Аралдың тумасы. Сонау 1986 жылдары ата-анасымен Қы­зылқұмда жатқан ауылға қоныс аударған. Жаны техниканы қалайтын жас жігіт шаруа­шылықта трактор айдап, еңбектің көрігін қыз­дырған. Әкесі Балгерден үйренгені көп. Техниканың тілін меңгерген марқұм әкесі баласына тракторды тізгіндеуді, оның ақауларын жөндеуді о бастан құлағына сіңіріп, үйреткен. Кейін шаруашылық жұмысы тұралап қалғанда жұмыссыз отырмай түрлі шаруамен айналысып, отбасын асыраған. Қазір Жанат ағаның 7 баласы бар. Үлкені Ерболат – әкесінің көмек­шісі. Оның да техникаға жақын болуы отба­сылық бизнесті ілгері жүргізуге көмегін тигізуде. Ал аудандағы аграрлы-тех­никалық колледжде дәнекерлеуші маман­дығында оқитын ұлы Досбол демалыс күндері әкесіне қолғабыс етуге асығады. Қос көмекшісінің арқасында шеберханада жұмыс тоқтаусыз жүруде. Таңертеңнен басталатын қауырт қызметке жүгінетіндер қатары қалың. Көршілес ауылдан келетіндер де көп.

– Көптен бері ойлап жүрген кәсібімді бас­тауға мемлекеттік бағдарлама себепкер болды. Бұрыннан өзімнің де техникаға құмар­лығым бар. Көпбалалы отбасы ретінде алдымен «Бастау Бизнес» қурсынан өтіп, сертификат алдым. Ауыл әкімдігі тарапынан осындай мүмкіндіктердің бар екенін түсіндірген мамандарға рақмет. Жақында «Стартап» бизнес идеяларды іске асыру бағдарламасы бо­йынша қайтарымсыз грант конкурсынан 1 225 200 теңгені жеңіп алдым. Аталған қаржыға  дөңгелек орнату құрылғысын, баланстау құра­лын, үш тонналық домкрат, ауа айдайтын, т.б. қажетті құралдар сатып алдым. Жұмыс бар, осындай мүмкіндікті берген мемлекетке рақмет. Бизнесімді бастау арқылы табыс та­уып, отбасымды асыраймын, – дейді кәсіпкер.

Айту керек, биыл аудан бойынша мемле­кет­тік грант арқылы кәсібін бас­тағандар саны артқан. Кәсіпкерлердің дені мал шаруашы­лығымен айналысуға тілек білдірсе, іңкәр­дариялық шебер секілді техника жөндеу орта­лы­ғын ашқандар да бар. 

Ер азаматтың бастаған ісіне қолдау білдіріп отырған отбасындағы жасы сексенге келген анасы Ажаркүл мен келіншегі Зүбайра барда үйде береке болары анық. Орталықтың ашылуында еңбек ардагері Дүйсенбай ақсақал ба­та беріп, кәсібіне береке тілеген.

Бибісара ЖАНӘЛІ