Қоршаған орта тазалығы жауапкершілікті қажет етеді

Жыл басынан бері аудан бойынша санитарлық тазалық жұмысы жалғасын табуда. Көшенің көрікті келбетке енуіне қоғамның әрбір мүшесі жауапты. Қоршаған ортаны күл-қоқыстан арылту үшін әр апта сайын сенбілік ұйымдастырылуда. Әйтсе де, жергілікті тұрғындар жауапкершілікті сезінбеуде.

Қазіргі уақытта Тереңөзек кенті мен әрбір елді мекеннің аумағы кеңеюде. Жаңа тұрғын үй түскен көшенің саны артқан. Осы кезге дейін құрылыспен айналысып, үй тұрғызған көпшілік тұрмыстық қал­дықты көшеге тастауды әдетке айналдырған. Экологиялық тұрғыдан қоршаған ортаға зиян кел­тіретін қоқысты белгіленген орынға тастау мә­дениеті қалыптасқаны абзал. Әрине, бәрінен ма­ңыздысы, тазалыққа келгенде адамдардың нем­құрайлылық танытпау керектігін естен шығарма­ған абзал.

Айта кетейік, өткен аптаның сенбісінде мем­лекеттік және тағы да басқа мекеме қызметкерлері тазалық жұмысына үлес қосты. Жұдырықтай жұ­мылған аудан тұрғындары жекелеген көшенің қоқысын жинап, арнайы полигонға апарып тастады. Қоңыр күзде ерекше кейіпке енген ағаштардың жапырағы жиналған арықтың іші де тазартылды. Сонымен бірге темір қоршауларды сырлау, жол белгісі мен жолақты қайта қалпына келтіру күн тәртібінен түскен емес. Ал көпқабатты тұрғын үйдің сыртқы келбетін таза ұстау, айналасына күл-қоқыс тастамау адамдардың жеке жауапкершілігіне кіруі тиіс. Айта кетейік, сен­білік­те Тереңөзек кенті бо­йынша Ғ.Мұратбаев, Д.Керейтбаев, О.Мәлібаев, Қ.Қазантаев, «Қызыл­орда-Жалағаш» автожолының бойы және де білім мен денсаулық саласы ғимараттарының ауласы тазартылды.

– «Дені сау адам – табиғаттың ең қымбат жемісі» деген тәмсіл жиі есіме оралады. Әрине, денсаулық мықты болуы үшін өзіміз тұрып жатқан қоршаған ортаны таза ұстауымыз керек. Бүгінде жасы да, жасамасы да кейде тазалыққа селқостық танытады. Көктем мен күзде күл-қоқысты жойып, үйінің айналасын мұнтаздай еткені дұрыс. Сенбі күні сенбілікке шыққан көпшілікті көзіміз көріп жүр. Барын салып тазалап жатқан кісілерге масаттанып қарайтындар баршылық. Өзіміз экологиялық аймақта тұрғандықтан, оны жақсартуға барымыз­ды салайық. Арасында күрек, кетпен, тырмамыз­ды қолымызға алып, табиғатқа жанашырлық таны­тудың ешбір әбестігі жоқ, – дейді кент тұрғыны Р.Байтөреева.

Алдағы уақытта тазалық жұмысы тұрақты түрде аудан бойынша жүргізілетін болады. Жалпы­аудандық сенбіліктің мақсаты аудан көшелерінің тазалығын сақтауға қоғам назарын аудару, тұр­ғындар арасында экологиялық мәдениетті қалып­тастыру екені мәлім. Бұл ретте, жергілікті тұр­ғындардың сенбілікке белсенді түрде қатысуы тазалықтың сақталуын қамтамасыз етеді.

Балтабай ОРДАБЕКОВ