Тіршілік тынысы Tirshilik-tynysy.kz ақпараттық агенттігі
» » Бояу кітапшалары балғындарға жол тартты

Бояу кітапшалары балғындарға жол тартты

Биыл «Балалардың амандығы – мемлекетіміздің жарқын бола­шағының сенімді кепілі» деген Президент сөзін басты ұста­ным еткен «Балалар жылын» да қорытындылайтын уақыт жа­қындап қалды. Ұрандап, мереке түрінде атап өту ғана емес, балаларды қорғау мақсатында ең алдымен денсаулық сақтау, білім беру және әлеуметтік қам­сыздандыру саласында нақты іс-шаралар жасалуға тиіс болды. Осы тұста, айтулы жылдың ма­ңызын айшықтау мақсатында облыс орталығында бояу кітап­ша­ларының тұсаукесер рәсімі өтіп, балғындарға жол тартты.

Қазақстан нарығында баспа саласында ширек ғасырдан аса қызмет көрсетіп келе жатқан «ASU» баспа үйі» ЖШС мен «Балапан» телеарнасы арасында жасалған келісімшарт негізінде алғаш рет отандық анимациялық фильмдердің бояу кітапшаларын шығару қолға алынды. Соған байланысты айтулы жыл аясында бүлдіршіндер зор қуанышқа кенеліп отыр.

Қызылорда облысы Қоғамдық даму басқар­масының қолдауымен, «Қызылорда қаламгерлер қауымдастығының» ұйымдастыруымен «Бала­­пан» теле­арнасының «Сиқырлы тас», «Әл-Фараби» мультсериалдары бойынша шығарылған бояу кітапшаларының тұсаукесері Ә.Тәжібаев атын­­дағы облыстық кітапханада өткізілді. Бұл іс-шараға Қызылорда облысы әкімінің орынбасары Н.Сақтағанов, облыстық қоғамдық даму басқармасының басшысы М.Қазбекова, облыстық мәслихат депутаты, «Сыр медиа» ЖШС бас директоры А.Оңғарбаев, Қазақстан Суретшілер Одағының мүшесі, М.Мәметова атындағы жоғары педагогикалық жоғары колледждің оқытушысы А.Қарамұрзаева, «ASU» баспа үйі» ЖШС-ның ди­ректоры Қ.Қыдырбаев, сондай-ақ балалар мен оның болашағына бей-жай қарамайтын ай­ма­ғымыздың зиялы қауымының өкілдері, БАҚ өкіл­дері, білім беру саласының басқарма, бөлім басшылары, кітап саудасы саласының менеджер­лері қатысты.

Тұсаукесер рәсімде Қызылорда облысы әкімі­нің орынбасары Н.Сақтағанов сөз сөйлеп, жаңа кітапшалардың балалардың білімін арттыруға сеп­тігін тигізетінін атады. Осындай туындылар арқылы олар қазақтың біртуар тұлғаларын тани­тынын, сондай-ақ ойлау қабілеттері ерте жеті­летінін тілге тиек етіп, бұл ерекше бастама екенін айтты.

Эфирлік қаралымы жоғары болған 3D фор­матындағы «Сиқырлы тас» мультсериалының кейіпкерлері алты жасқа дейінгі балаларға ар­налған. Бұл мультсериал балалардың ой көкжиегін кеңейтуде, қиял-ғажайып әлемін дамытуда үлкен маңызға ие. Сондай-ақ әлемдік ғылымға екінші өмір сыйлағаны үшін шығыс ғұламалары Арис­тотельден кейінгі «екінші ұстаз» деп атаған ұлы ғалым Әбу Насыр әл-Фараби баба жайында түсірілген «Әл Фараби» мультсериалының жо­басы алты жастан асқан балаларға арналып отыр. Мұнда балалар кейіпкерлерді бояп қана қоймайды, ұлы ойшылдың қанатты сөздерін көңіл зердесіне тоқиды.

Балғындарға жол тартқан кітапшалар арқылы балалар көгілдір экраннан тамашалайтын сүйікті кейіпкерлерін бояй отырып, олардың бейнелеу өнеріне деген қызығушылығын арттыру мақ­сат етілген. Мұның жас балғындардың шығар­ма­­шылық ой-өрісін дамытуға септігі зор. Кітап­шада орналасқан QR белгісін сканерлеу арқылы екі мультсериалды да кез келген қолайлы уа­қытта тамашалауға болады. Мультсериалдар ке­йіпкері мен ондағы оқиғалар бейнеленген бояу кітапшалары күнделікті смартфон ұрлап жатқан бала тәрбиесіндегі бос кеңістікті толтырады деген сенім мол.

Е.БЕРКІНБАЕВ
12 қараша 2022 ж. 317 0