Елді мекендердегі кезекті кездесулер

«Халық үніне құлақ асатын мемлекет» тұ­жырымдамасы негізінде қазір облыс, аудан әкімдері тоқсан сайын халықпен кездесіп, мә­селелерін тыңдауда. Осыған дейін аудан­ әкі­мі Мұрат Ергешбаев барлық ауылда тұр­ғындармен бірнеше мәрте кездескен болатын. Соның жалғасы ретінде төртінші тоқсандағы халықпен жүздесу Айдарлы, Жетікөл, Аман­келді ауылдарында өтті.

Кездесулерде аудан басшысы алдымен ауданның әлеуметтік-экономикалық дамуын саралады. Есепті кезеңде барлық салада өсу көрсеткіші қалыптасқанын, соның нәтижесімен «Үздік аудан» атанғанымызды айтты. Мем­­лекет басшысының қол­да­­уы­мен салаларда оң динамика қалыптасқанын, оның ішінде ауыл шаруашылығы са­ла­сында серпінді жұмыстар атқарыл­ғанын жеткізді. Соның негізінде аудан орталығынан шал­ғайда орналасқан елді мекендерде аяқ су мәселесі шешіліп келе жат­қанын тілге тиек етті. Мұның ауылдарда кәсіпкерліктің жандануына, тұрғындар әлеуе­тінің жақсаруына септігі мол екенін атады.

Аталған елді мекендерде күр­делі шешімін таппай келе жат­қан мәселелер бар. Бұл ауыл­дарда ірі шаруашылықтар жоқ, электр желілері тозығы жет­кен, аяқ су мәселесі де түйіткілді. Бұл мәселелерді тұрғындар алдыңғы кездесулерде көтерген болатын. Осы бағытта аудан әкімдігі тиісті сала басшылармен бірлесіп, қажетті жұ­мыстарды атқарды.

Электр желілері бойынша аудан әкімдігімен ұсынылған жоба­ға сәйкес тиісті қаржы бөлінді. Қазіргі таңда мемлекеттік сатып алу жұмыстары жүргізілуде. Бүгінгі күні Жетікөл ауылына инвесторлар келуде. Алғашқы жер ашу, тұқым әкелу жұмыстарын жүргізуде.

Аяқ су мәселесіне қатысты аталған елді мекендерге келетін каналдардың биылғы жылы та­зартылғандары бар. Дегенмен, жұмысты тоқтатпай, облыстық ме­кемелермен бірлесіп, жобаларды ұсына отырып, тазарту жұмыстарын жалғастыруды аудан әкімі сала басшыларына тапсырды.

Жетікөл ауылында ұялы байланыс өте қиын болып келген. Ауыл әкімі демеушілерді тарта отырып, жыл соңына дейін «Kcell» байланыс операторының антеннасын орнату бойынша ке­лісімге келгенін жеткізді.
Кездесулерде тұрғындар өз­де­рінің ұсыныстарын жеткізді.

«ТТ» ақпарат