Республикалық байқауға жолдама

Ақжармалық Аңсар Нұрланұлы №130 Абай атындағы орта мектепте 8 сыныпта оқиды. Ол жақында «Тарихи ше­жірем. Менің тегімнің тарихы» атты жалпы білім беретін мектептер арасында өтетін республикалық байқауға жолдама алды.

Алдымен аудандық кезеңде 15 оқушы­ның арасынан оза шапқан талапкер облыста да үздік атанды. 25 оқушының арасынан бір өзі Астана қаласында өтетін республикалық кезеңде өзінің жазған еңбегін қорғайтын болады. Жобаны же­тек­шісі – тарих пәнінің мұғалімі Мәрия Есі­мо­ва­мен әзірледі.

Аңсар Нұрланұлы қазылардың алдында өзінің шыққан тегін, руын, ата-бабасы туралы ізденісін қорғап шықты. Бірінші портфолиясында жазылған отбасының ше­жіресін мүдірместен айтып шығып, бесінші атасы Сүлеймен атасына тоқталды. Арғы атасы Сүлеймен арабша сауатты, емші болған. Қасиеті көп бабасы ел-жұрты берген сыйларын ешқашан алмай, кедей-кеп­шікке үлестіріп берген. 80 жасында өмірден озған Сүлейменнің жұбайы Абза 13 құрсақ көтергенімен оның жетеуі өмір жалғастырмаған. Яхия мен Абат және бес қыз өсіп-өніп, үлкен әулетке айналған. Жобасын таныстырған Аңсар өз атасы Яхияның совхозда күріш еккенін айтады. Ал екінші атасы Абат туралы арнайы портфолия дайындап, көпшілікке таныстырған.

Ауданға есімі белгілі Абат Сүлейменов – «СССР мемлекеттік сыйлығының лауреаты» атағын алған азамат. Еңбектегі зор табыстары үшін «Қызыл Ту», «Октябрь революциясы», «Ленин» орденімен наград­талған. Бүкілодақтық халық шаруашылығы жетістіктері көрмесінен сыйлыққа жеңіл автокөлік мінген. Заманында озат күрішші атанған еңбек адамы бірнеше рет облыс­тық, аудандық Кеңестің депутаты, облыс­тық партия комитетінің бюро мүшесі болып сайланған. Гектарына 129 центнерге дейін өнім алған атақты күрішшінің еңбегі лайықты бағасын алған.

Байқауға қатысудағы мақсатын Сүлей­мен бабасы мен Абат Сүлейменов атасының есімін қайта жаңғырту деп түсіндірген жас талапкер осы еңбегі арқылы кейінгі ұр­паққа үлгі етті.

Тамырын тереңге жайған әулеттің ұр­пағы Аңсар Нұрланұлы өз әкесінің есімін де мақтанышпен айтады. Батыр аталарының ізін жалғастырушысы ретінде болашақта жас өрендерді тектілік пен ата-баба тарихын, шежіресін жетік біліп, қастерлеуге үндейді.

Білім бәйгесінде оза шапқан Аңсар – үздік оқушы. Әкесі Нұрлан «Ақжарма және К» шаруа қожалығында күріш егеді, анасы Фарида – мектепте мұғалім. Әпкесі Нұрай – да мектепте жас маман, ал інісі Ернар – 3 жаста.

Ұлттық құндылықтарды дәріптеп, ше­жіре мен ата-баба дәстүріне құрметпен қарау – Аңсардың қанына сіңген қасиет. Сондықтан алдағы болатын республикалық кезеңде де жас шежірешісінің жұлдызы жар­қырай түссін деген тілектеміз.

Бибісара ЖАНӘЛІ