Шеберлікте шек бар ма?!

Аудан орталығындағы Тереңөзек кенті мәде­ниет үйінде «Нұр-Рамазан» оқу орталы­ғының ұйым­дастыруымен салтанатты куәлік тапсыру рәсімі өтті.

«Нәтижелі жұмыспен қамту және жаппай кәсіпкерлікті дамыту бағдар­ламасы» аясында қысқа мерзімді курс тыңдаушыларына қолөнер шебері Нұрсұлу Ажарова дәріс берген. Оқу орталығы 2012 жылы құрылып, мүм­кіндігі шектеулі жандарды, жұмыссыз қыз-келіншектерді оқыту және жұмыс­пен қамтуды мақсат еткен. Қоғамдық қор жанынан ашылған курста қыз-келіншектер тігін ісінің қыр-сырымен танысып, оны үйреніп, кәсіпкер болу­ларына қолдау жасалуда. Оқуды аяқ­тағандарға жұмысқа орналастыру мүм­кіндігі де қарастырылған.

Салтанатты жиында аудан әкім­дігінің халықты жұмыспен қамту орта­лы­ғының маманы Әбдіманап Батталов пен аудандық кәсіпкерлік, өнер­кәсіп және туризм бөлімінің сектор меңгерушісі Ләззат Қозыбаева арнайы курсты аяқтаған тігіншілерге арнайы сер­тификат пен куәліктерін тапсырды.

– Тігінші дегеніміз – дәлдік, теңдік, үйлесім, жарасым, сәндік, сұлулық се­кілді дүниені қамтитын шығармашыл адам. Тігінші өз қолынан шығарған бұйымы арқылы көңілге шабыт, шат­тық ұялатады, адам бойына сәндік сыйлайды. Қысқа мерзімді курс барысында қыз-келіншектерді тігіншілікке үйрету арқылы ептілікке, іскерлікке, шеберлікке, дәлдікке баулыдым. Оқу курсын ойдағыдай аяқтағандардың арасында ер азаматтар да бар. Бо­лашақта барлығы да жұмыспен қам­тылып, сондай-ақ, осы бағыттағы кәсіппен айналысып, үйренгендерін іс жүзінде көрсетіп, табыс табады деген сенімдемін, – дейді оқу орталығының жетекшісі Н.Ажарова.

Іс-шарада оқу курсын бұдан бұрын аяқтап, осы күні кәсіпкерлік саласына ден қойған бірқатар тігінші шеберлерге орталық басшысы «Алғыс хат» тапсырды.

Жиын соңында екі келінін бірдей оқытқан 81 жастағы кейуана Зияш Үсенова жұмыссыздарды қолдап, мем­лекеттік бағдарлама арқылы арнайы курс ұйымдастырған оқу орталығына алғысын білдіріп, батасын берді.

Айту керек, 2019 жылдан бастап тігін ісіне үйретіп келе жатқан оқу орта­лығының жетекшісі осы күнге дейін 70 тыңдаушыға арнайы куәлік тапсыр­ған. Жалпы, ауданда осы ба­ғыттағы жұмыстарға қыз-келіншек­тер ерекше қызығушылық танытуда.

Бибісара ТАҢАТАРҚЫЗЫ