Оқу құралдары берілді
Жаңа оқу жылы басталар тұста республика бойынша «Мектепке жол» акциясы ұйымдастырылады. Бұл игі іс-шараның басты мақсаты әлеуметтік аз қамтамасыз етілген отбасылардан шыққан оқушыларды оқу-құралдарымен қамтамасыз ету екені белгілі.Білікті дәрігер, іскер ұйымдастырушы Жалғасбек Үсенов басқаратын Сырдария аудандық ауруханасында «Мектепке жол» қайырымдылық акциясы ұйымдастырылды. Ақ халатты абзал жандардан құралған үлкен ұжым бұл жолы 23 ер бала мен 21 қыз балаға, яғни барлығы 44 оқушыға мектеп сөмкесі мен оқуға қажетті құрал-жабдықтар сыйлап, балаларды қуантты.
– Біздің ұжымда қалыптасқан жақсы үрдістер көп. Соның бірі жаңа оқу жылы қарсаңында міндетті түрде «Мектепке жол» акциясын ұйымдастыру. Қайырымдылық іс-шарасына қатысып, қолдау білдірген әріптестеріме алғысымды айтамын. Биыл «Балалар жылы» екені белгілі. Осы ретте 44 баланы қуантып, оларға қажетті оқу құралдарын үлестірдік. Алдағы уақытта да осындай игі іс-шараларды ұйымдастыруға басымдық береміз. Себебі әр бала заман талабына сай білім алуы тиіс. Сондай-ақ біз балалар арасында кездесетін ауруларды да болдырмау мен алдын алу бағытында нақты жұмыстар жүргізіп жатырмыз, – деді ауданның бас дәрігері Жалғасбек Тұрлыбекұлы.
Қайырымдылық іс-шарасында кәсіподақ ұйымының төрағасы Қайрат Ерманов, бас мейіргердің міндетін уақытша атқарушы Нұргүл Мұхамеджан Сырдария аудандық ауруханасы қызметкерлерінің атынан ата-аналар мен балаларды жаңа оқу жылымен құттықтап, білім алушыларға сәттілік тіледі. Сондай-ақ ата-аналар ұжым қызметкерлеріне алғысын айтып, ақ халатты абзал жандардың жауапкершілігі зор жұмысына абырой тілеп, ақ баталарын берді.
А.ҚҰРМАНАЙТЕГІ
