МЕКТЕПКЕ ЖОЛ АКЦИЯСЫ: БАР ШАПАҒАТ БАЛАҒА

Қазақстан Республикасы Білім және ғылым министрлігі «Мектепке жол» дәстүрлі республикалық қайырымдылық акциясын ұйымдастырып келеді. Министрліктің әлеуметтік бағыттағы бұл бастамасы бүкіл республика бойынша 2019 жылдың 1 тамызбен 30 қыркүйек аралығында өткізіледі. Акцияның мақсаты – аз қамтылған және көп балалы отбасыларынан, жетім және ата-анасының қамқорлығынсыз қалған балаларға жаңа оқу жылына дайындық кезеңінде көмек көрсету және әлеуметтік себептер бойынша балалардың мектепке бармауының алдын алу болып табылады. Сонымен қатар, акция барысында мектепке бармайтын балаларды анықтауға, мектепке дайындау бойынша әлеуметтік қорғалмаған отбасынан шыққан балаларға көмек көрсетуге басты назар аударылады. Айта кетейік, акцияны өткізудің он жылы ішінде 2 млн-нан астам балаға жалпы сомасы 17 млрд теңгеден астам материалдық көмек көрсетілген.

Бұрнағы күні аудан орталығындағы №35 И.Тоқтыбаев атындағы мектеп-лицей базасында осы акция өз жалғасын тапты. Білім мекемелерінде жұмыс жасайтын, аз қамтылған отбасы балаларына арналған шараны аудандық білім бөлімі қызметкерлерінің кәсіподақ комитеті ұйымдастырды. Акцияда ардагер-ұстаз А.Ізбасарова, аудандық білім бөлімі қызметкерлерінің кәсіподақ комитетінің төрағасы А.Есназар акцияның маңыздылығы жөнінде сөз етті. Ресми шарадан кейін балаларға мектеп құралдары салынған сөмке табысталды. Осындай жүрегі мейірімге толы, ақжүрек, жомарт жандар көп болғай. Жыл сайынғы өткізіліп жатқан осынау шараға демеушілер мен меценаттар 2019 жылға дейін жалпы сомасы 7,9 млрд теңгеден астам көмек пен қолдау көрсеткен. Мемлекеттік органдар мен ұлттық компаниялардың акционерлік қоғамдар мен жекелеген кәсіпкердің жыл сайын акцияға белсенді қатысқандығы қуантады.

Ұлбосын КЕНІШБЕК