Білім мен тәрбиенің алғашқы баспалдағы

Қалжан ахун ауылындағы «Гүлдер» бөбекжай балабақшасының іргесі 1986 жылы қаланған. Көне ғимарат 2015 жылы күрделі жөндеуден өтіп, жаңа кейіпке енді. Балабақша 2018 жылдан бастап бөбекжай болып қайта құрылды. Соңғы төрт жылдан бері мұнда ауылдың 70 бүлдіршіні мектепке дейінгі біліммен және тәрбиемен қамтылуда.

Балаларды жас ерекшелігіне сай 3 топқа бөліп тәрбиелейтін балабақша ұжымында 12 педагогтың 2-еуі педагог-сарапшы, 3-еуі пе­дагог-модератор біліктілігін алған. Мамандар мектепке дейінгі тәрбие мен оқытудың мем­лекеттік жалпыға міндетті стандартына және мектепке тәрбие мен оқытудың үлгілік оқу бағ­дарламасын іске асырады.

– Балабақшаның білікті педагогтары оқу жы­лында оқу қызметінің сапалы өтілуіне, ре­жимдік сәттердің дұрыс сақталуына аса мән береді. Сонымен қатар денсаулық күндері дене шынықтыруға байланысты сауық кештері мен түрлі мерекелік іс-шаралар ұйымдастыру жоспарға енген. Тәрбиешілердің «Дене шы­нық­тыру әлемінде» кеңейтілген оқу қыз­меті, «Денсаулықты сақтайық!» барлық топ­тың қа­тысуымен ұйымдастырылатын денсау­лық күні, «Көңілді доптар» спорттық ойындар жарысы, «Ханталапай» ұлттық ойыны, «Болашақ шабандоздар» тақырыбындағы эста­фе­талық жарыстары жоғарғы деңгейде өте­ді. Негізінен ауылдағы 2-5 жастағы бүлдіршіндердің бала­бақ­шадан жақсы тәрбие мен білім алуына жағдай жасалған, – дейді балабақша мең­ге­ру­шісі Гүлмира Махамбетова.

Балабақша басшысының айтуынша, жыл­дық жоспарға сәйкес білім беру процесінің ашық көрсетілімі барлық тәрбиешілерге мін­дет­телген. Олар шығармашылық бағытында ин­но­вациялық технологияларды қолданып, ба­лалардың шығармашалық қабілетін дамытады. Сондай-ақ «Таным» білім беру саласында жаратылыстану, математика негіздері оқу қызметі бойынша барлық педагогтың ашық оқу қызметтері жақсы бағаланған.

Жыл сайын балабақшада жыл мезгілдеріне сай мерекелік іс-шаралар жоғары деңгейде ұйымдастырылады. «Сары алтындай, жарқын күз!», Тәуелсіздік күніне арналған «Тәуелсіздік таңы неткен арайлы» тақырыбындағы апта­лық, «Кел, Жаңа жыл, жаңа жыл!» тақы­ры­бындағы ертеңгілік, «Кел ортаға, жатты­ғайық, балақай!» таңертеңгі жаттығулар апта­лы­ғы­ның ашық көрсетілімі барлық топта өтеді.

Сонымен қатар «Өнерлі шеберлер» театр­ ке­йіп­­керлерін жасау жолдарынан шебер сы­нып көрсетілімі, 8 наурыз аналар мере­­­­­­ке­сіне арналған «Анашым, ардақтым!» тақы­рыбындағы ертеңгілік, Ұлыстың ұлы күніне арнал­ған сахналық қойылымдарға балабақша бала­қайлары қатысып, қызықты әрі әсерлі іс-ша­ра­ның кейіпкеріне айналады.

Шығармашылық қабілет пен білікті педа­гогтардың кәсібилігі тәрбиеленушілерді жетіс­тікке жеткізді. Атап айтар болсақ, биылғы оқу жылында Қызылорда облысының білім басқармасының Тәуелсіздіктің 30 жылдығына орай балабақша мен мектепалды даярлық топтар арасында «ЭкопроектОнлайн» облыстық шығармашылық байқауы өтті. Байқауға қа­тысқан балабақша тәрбиеленуші Айдын Жақсығали екінші орынмен марапатталды. Аудандық білім бөлімінің «Біз жеңістің ізба­сарларымыз» атты жас суретшілердің сурет байқауында үздік өнер көреткені үшін Ай­сұлтан Төребек жүлделі екінші орын алды.

– Жаңартылған білім мазмұнымен, шығар­ма­шылықпен жұмыс жүргізетін, шебер, өз ісін жетік меңгерген тәрбиешіні анықтау мақ­сатында балабақшаішілік байқаулар өткізіліп тұрады. Тәрбиешілерге қазіргі озық технологияны оқу қызметтерінде қолдана білу тала­бы қойылады. Осы оқу жылының жос­па­­рына сәйкес аудандық білім бөлімінің ұйым­дас­тыруымен «Ұлы даланың жеті қыры» та­­қырыбында семинар болды. Семинар­ға ау­дан­дық білім бөлімінің мамандары, бала­бақ­ша меңге­рушілері мен әдіскерлер, тәрбие­шілер қатысты. Әріптестеріміз бала­бақша педа­гог­та­ры­ның ұйымдастырылған оқу қыз­мет­­­тері мен ата-­анамен жұмыс түрлерімен танысып, тә­жі­рибе алмасты, – деді әдіскер Патыма Мықбаева.

Семинар барысында жүргізілген кіші «Бота­қан» тобының тәрбиешісі Қ.Рахымбаева жаратылыстану оқу қызметі бойынша «Апорт алма», ортаңғы «Балапан» тобының тәрбиешісі К.Сәрсенбаева «Туған жерім – тал бесігім» ғылыми жобасын, ересек «Балдырған» тобы­ның тәрбиешісі Ж.Таюпова «Ер қанаты – ат» тақырыбында ашық оқу қызметін жо­ғары дәрежеде өткізді. Музыка жетекшісі А.Әлім­бетованың «Ұлы дала тарихына саяхат» қо­йылымы да қатысушылардың жақсы бағасын алды.

Педагогтарды аттестаттаудан өткізу бо­йынша 2021-2022 оқу жылында 4 тәрбиеші сарапшы, 3 тәрбиеші модератор біліктілік санатынан өткен.

Мектептің алғашқы баспалдақтарында баланы жеке адам ретінде қалыптастыруға, өз­гелермен қарым-қатынас жасауға үлкен мән беріледі. Сондықтан балаларды оқу еңбегіне үйретуге, адамгершілік, эстетикалық, дене тәр­биесі мәдениетіне баулу тәрбиешілердің ба­са назар аударатын міндеті. Баланың жан-дүниесі балабақша қабырғасында қалана­тын­дықтан «Гүлдер» балабақшасының ұжымы же­місті еңбек етуде.

Бибісара ТАҢАТАРҚЫЗЫ