Жарасымдылық символы
Берекелі мерекені Тереңөзек кентіндегі Ғ.Мұратбаев көшесінің тұрғындары да жоғары деңгейде атап өтті. Ақ дастархан басына жиналған көше тұрғындары медицина саласының ардагері Астрахан Қожақовтың ақ батасын алды.Нұрлан Оразбековтың шаңырағында бас қосқан көше тұрғындары Сәлима Сәбитқызын бесікке салды. Бесікке салу рәсімін көше тұрғыны, қасиетті Меккеге қажылық сапарын өтеген ардақты ана Шырынкүл Есқараева жасады. Аяулы ана жас келіндерге бесікке салу рәсімінің жөн-жоралғысын түсіндірді. Бесікте баланың жайлы жатуына, ұйқысы тыныш болуына байланысты ырым-тиымдарды айтты. Және де үй иесі Нұрлан Оразбеков кішкентай бүлдіршін Мұстафа Маратұлының тұсауын кесті. Сонымен бірге көпшілік балақайға ақжолтай тілегін жеткізді. Келіндер үлкендер қауымына сәлем салды. Ақ жаулықты аналар мерекенің мән-мағынасын ұғындырып, наурыз көженің дайындалу тәсілдерін көрсетті. Наурыз мерекесінде көше тұрғындарына «Үлгілі отбасы», «Ғашықтар отбасы», «Табыскерлер отбасы», «Шеберлер отбасы», «Өнерлі отбасы» секілді номинациялар табысталды.
Осылайша, кенттегі ең ірі көшелердің бірі саналатын Ғани Мұратбаев тұрғындары ынтымақ-бірліктің, ырыс-берекенің бастауы Ұлыстың ұлы күні екенін айшықтай түсті.
