Іргелі ұжымға риясыз ризашылық

Біз бала тәрбиесі туралы сөз қозғалғанда бала­ла­рымызға білім мен тәрбие берген мұғалімдерге ерекше алғыс айтамыз. Осы ретте балаларымыз­дың бала­бақшадағы тәрбиешілері естен шығып, еңбек­тері ескерусіз қалып жататыны жасырын емес. Көктемнің алғаш­қы күнімен тұспа-тұс келген Алғыс айту мерекесі қарсаң­ында бізге бір топ ата-ана хабарласып, Тереңөзек кентіндегі №2 «Бал­дәурен» бөбекжай балабақшасының тәр­бие­ші­леріне риза­шылықтарын білдірді.

Еңбек ардагері Гүлжан Оспанованың немересі Ме­­рей­лім Әлиасқарова – аталған балабақшаның тәр­биелену­шісі. Балақай бүгінде көптеген тақпақтарды жат­қа айтады, ән салып, би билейді. Ол тәрбиешілері­нің арқа­сында аудандық, облыстық байқауларда топ жарып жүр.

– Үлкен немереміз Шаһкерімді де осы балабақшаға бергенбіз. Ол – бүгінде оқу озаты. Екінші немерем Мерейлім де балабақшадан жақсы білім алуда. Түрлі форматтағы іс-шараларға белсене қатысып, оқуға, өнерге деген қызығушылығы ашылды. Бұл тәрбие­шілердің тынымсыз еңбегінің жемісі деп білемін. Бала­ның болашағы балабақшада қалыптасады. Бала­бақшада жақсы негіз қаланса, кейін мектепте алғыр болып өседі. Сондықтан сапалы білім мен саналы тәрбиені ұштастырған іргелі ұжымға айтар алғысымыз шексіз. Әсіресе әдіскер Аружан Ыбайділдаева, педа­гог-психолог Шолпан Қуанышова, Нұргүл Махан­бет­жановаларға ризамыз, – дейді ардагер.

№2 «Балдәурен» бөбекжай балабақшасына риза­­шылығын білдірген келесі ата-ана – Айдана Болат. Ол Айым, Санжар, Қайсар есімді үш перзентінің үй­ден балабақшаға асығып тұратынын айтады. Бала­қайлардың балабақшадағы белсенді, талапты, талантты балалардың бірі екенін тәрбиешілері де растайды.

– Бала – бақытымыз. Олардың әр қылығы, әр жетіс­тігі ата-ана үшін зор қуаныш. Балаларымызға білім беріп, ақыл-кеңесін аямай, талантына қанат бітіріп жүр­ген балабақша тәрбиешілеріне айтар алғысымыз шексіз. Жасыратыны жоқ, қазір бала тәрбиесінің өзектілігі артты. Үйдегі екі-үш балаға көп көңіл бөлуге уақыты болмай, олардың бос уақытын дұрыс жоспарлай алмай жүрген ата-аналар көп. Оның қасында Әсел Төле­генова, Мархавад Жапбасбаевалар жүздеген баламен жүйелі жұмыс жасап, бәріне үлгеріп жүрген тәрбиешілердің еңбегі барлық құрметке лайықты. Мен тәр­­биешілердің еңбегін мұғалімдерден кем көрмеймін, – дейді Айдана Болат.

Кент орталығындағы №2 «Балдәурен» бөбекжай балабақшасының тарихы тереңде. Негізі қаланғанына жарты ғасырға жуықтаған мектепке дейінгі білім беру мекемесі 1973 жылдан бастап елдің ертеңгі тізгінін ұстайтын жас ұрпаққа заман талабына сай сапалы білім, саналы тәрбие беріп келеді. Балабақшаның ең алғашқы басшысы Ақжәми Балабаева болса, кейін Бибажар Лебаева, Тұрған, Қазына Жақыпбекова, Гүлмира Оразбекова, Күлжамал Жолдасовалар мең­герушілік қызмет атқарған. Меңгерушілерден бө­лек балабақшада бала жанының бағбаны атанған Айсұлу Арыстан­ова, Гүлмира Қуантаева, Айжан Қасымова, Гүлнар Шағыр­ова есімді тәрбиешілер, дәмді ас әзірлеп, асхананы шуаққа толтырған аспазшылар және балабақшаның тазалығына жауапты басқа да қызметкерлер еңбек етуде. Қазіргі таңда балабақшаның меңгерушісі – білікті басшы Ақанай Шоханова.

Балабақшада ұзақ жылдар еңбек етіп, жүздеген тәрбиеленушінің ең алғашқы ұстазы атанған Айткүл Ахмедова бүгінде балабақшаның құрметті ардагері. Ардагер әріптестерінің атаулы күндер мен мерекелерде ұмытпай, құрметті қонақ ретінде шақырып, жақсы іс-шаралар ұйымдастырып келе жатқанын жоғары бағалайды.

– Жақында әріптестеріміз «Өмір жолы өнеге» атты іс-шара ұйым­дастырды. Тағылымы мол іс-шарада балабақша ардагерлеріне құрмет көрсетілді. Тамаша концерттік бағдарлама ұсынды. Біз балалардың өнерін тамашалап, қуанып қалдық. Мұның бәрі ұжымның бекем бірлігін, көркем тірлігін білдіреді. Сондықтан ата-аналармен қатар ардагерлер қауымы да балабақша ұжымына алғыс айтамыз. Көктемнің алғашқы күнімен тұспа-тұс келген Алғыс айту мерекесі отбасыларыңызға бақ-береке әкелсін, – дейді ардагер.

Иә, осынау өмірде қоғам мүшелерінің алғысын арқа­лаудан асқан бақыт жоқ. Ал сол алғыс бір адамға емес, бүтін бір ұжымға айтылса, тіпті ғанибет емес пе! Ендеше іргелі ұжымға риясыз ризашылықтарын біл­дірген ата-аналардың тілегіне біз де қосыламыз. Бала жанының бағбағы болғаны тәрбиешілер жұмыста жетістікке жетіп, әрқашан алғыс арқалай берсін!

Ақтөре ИБРАГИМҰЛЫ