Басшылардан көрсеткіш емес, нәтиже сұралады

Мәжілісте аудан әкімі жылдың ал­­ғаш­қы тоқсаны аяқталуға жақын қал­­ғанын айтып, кент және ауыл әкім­деріне, дербес бөлім басшы­ла­рына бұған дейін берілген тап­­­сыр­малардың орындалу бары­сын саралады. Хаттамалық тап­сыр­­ма­лардың негізінде бір­­қатар сын-ескертпе айт­қан аудан басшысы бірінші тоқ­санның қоры­тынды­сымен кадр­лық шешім қабыл­­дай­тынын және ау­дан­дық мәслихат депутат­тары­ның ұсынысы міндетті түрде ескері­леті­нін атап өтті.

Бірінші мәселе бойынша аудан­дағы қоғамдық-саяси ахуалдың тұ­рақ­­ты­­лы­ғы жөнінде аудандық ішкі саясат бөлі­мі­­нің басшысы Бей­біт Смайлов баян­дама жасады. Жыл басынан бері аудан көлемін­де на­разылық митингісі мен пикет өткізу туралы өті­ніш­тер тіркелме­ге­нін атап өткен бөлім басшысы об­лыс­тың ықтимал әлеуметтік шиеле­ніс ошақтары карта­сына сәйкес жер қатынастары мәсе­лесі бойынша 3 ауыл тізімге енгізілгенін жеткізді.

– Бұл ауылдар бойынша жер мә­селесі және қоғамдық тәртіпті сақтау қатаң бақылауға алынып, қол­даныстағы заңдылықтар бо­йын­ша түсіндірме жұмыстары жүргі­зілуде. Сондай-ақ аудандағы саяси ахуалды тұрақ­­­тандыру бо­йынша әлеуметтік сауал­нама жүр­­гізіліп келеді. Бұл жұмыстар әр тоқ­­сан сайын өткізіліп, оған шамамен ауданның 1200 тұр­ғыны қа­тысуда. Қоғамдық-саяси ахуал­дың тұрақтылығын сақ­тау, шие­ле­ніс­тердің алдын алу мақ­сатында қоғам­дық-сая­си ахуалды тұрақ­тандыру және әлеуметтік-эконо­ми­калық сала­­­­ларда дағдарыс жағ­дайлар туын­дағанда азаматтармен келіссөздер жүргізуші жұмысшы то­бының алго­ритмі бекітілді. Алгоритм бойынша арнайы жұмысшы топ құрылып, жедел әрекет етуі тиіс салалардың іс-әрекеті белгіленді, – деді Б.Смайлов.

Бұл мәселе бойынша аудан әкімі ауданда жүргізілген әлеуметтік сауалнама нәтижесіне көңілі толмайтынын мәлімдеді. Сауалнама негізінде тиісті жұмыстарды үйлестіру, кемшін тұстарды ретке келтіру алгоритмі әлі мүлдем нақтыланбағанын айтты. Сондай-ақ рес­публикалық телеарналар мен мерзімді басылымдарда аудан туралы жаңалық аз жария­ланатынын назарға салып, аудандық ішкі сая­сат бөліміне осы бағыттағы жұмыстарды тез арада жандандыруды тапсырды.
Шағын және орта кәсіпкерлік – ел экономикасының негізгі драй­вері. Сондықтан жергілікті жерде кәсіпкерлік саласын дамытудың маңызы зор. Кәсіпкерлік дамыса, жаңа жұмыс орындары ашылады. Ал жаңа жұмыс орындары ашылса, жұмыссыздық азаяды. Сол арқылы біз қоғамдық-саяси ахуалдың тұрақтылығын қамтамасыз етеміз. Осы ретте мәжілістің күн тәртібінде қаралған үшінші мәселе – 2022 жылы жүзеге асырылатын кәсіпкерлік жобалар жөнінде болды. Бұл бойынша аудандық кәсіпкерлік, өнеркәсіп және туризм бөлімінің басшысы Н.Қарсақбаев мемлекеттік бағдарламалар арқылы берілетін гранттар мен несиелер жөнінде баяндады.

– Былтыр жаппай кәсіпкерлікті дамыту мақсатында аудан бойынша 2951 млн теңгенің 527 жобасына мемлекет тарапынан қаржылай қолдау көрсетілді. Оның ішінде 2790,9 млн теңгенің 284 жобасы несие болса, құны 160 млн теңгенің 243 жобасы грант. Жалпы ауданда 2522 шағын және орта кәсіпкерлік субъектілері тіркелсе, оның ішінде жұмыс жасап тұрған кәсіпкерлік субъектілерінің саны 2386-ға жетіп отыр. 2020 жылдың тиісті кезеңімен салыстырғанда кәсіпкерлік субъектілерінің саны 3,3 пайызға артты, – деді бөлім басшысы.

Аудан әкімі өз кезегінде ауыл әкімдерінің жұмысын кәсіпкерлік саласын өркендетумен бағалаған дұрыс екенін айтты. Сонымен қатар елді мекендердегі кәсіп бастағысы келетін азаматтарға мемлекеттік бағ­дар­ламалар жөнінде ақпараттар қолжетімсіз екенін сынға алды.
– Кәсіпкерлерге үкімет тарапынан берілетін қолдауларды неғұр­лым арттырумыз қажет. Біз сонда ғана әлеуметтік проблемалар, оның ішінде жұмыссыздық мәселесінің алдын ала аламыз. Тағы бір айта кететін жайт, ол – ауданымыздың қалаға жақын орналасуы. Біз алыс Аралда немесе шалғай Жаңақорғанда орналасқан аудан емеспіз. Қала қасымызға тиіп тұр. Бұл ерекшелікті дұрыс пайдалана білуіміз қажет. Оның ішінде, былтыр ауылшаруашылық өнімдерінің белдеуін қалыптастыру тапсырмасы бойынша қала халқының белгілі бір бөлігін ауылшаруашылық өнімдерімен қамтамасыз ете алсақ, ұтарымыз көп болмақ. Сондай-ақ аудандық кәсіпкерлік, өнеркәсіп және туризм бөлімі мен кент және ауыл әкімдері өздерінің жұмыс жоспарларын қаладағы қаржылық ұйымдармен, кәсіпкерлік палатасымен, тиісті салалық басқармамен бірлесе ұйымдастыруы керек. Әйтпесе ауылдағы қарапайым тұрғын қаладағы қаржылық ұйым­дардың қайда екенін, орналасқан мекен жайын, олардың қан­дай жеңілдіктер ұсынып жатқанын білмейді. Сондықтан бірлесе сүйе­мелдеу жұмыстарын ұйымдастыру керек. Ал мұндай жұмысты мен аудандық кәсіпкерлік, өнеркәсіп және туризм бөлімінен көріп тұрған жоқпын. Аз уақыттың ішінде нақты нәтижелер байқалмаса, бірінші басшының жауапкершілігін қараймын. Сондықтан кәсіпкерлік жобалар бойынша тек ұсыныс беріп қана қоймай, нәтижеге жетемін дегенше іздену, кәсіпкерлік жобаларды соңына дейін сүйемелдеу қажет. Әр ауыл әкіміне жыл соңына дейін қанша бизнес жобаны қаржы­ландыруы тиіс екенін нақтылап беру керек. Сосын сол жоспар бо­йын­­­ша нәтижесін сұрау керек, – деген аудан басшысы жұмыс сапасын жеке бақылауына алатынын айтты.

Осылайша күн тәртібіндегі барлық мәселелер талқыланып, аудан әкімінің орынбасарлары мен кент және ауыл әкімдеріне, дербес бөлім басшыларына тапсырмалар жүктелді.

Ақтөре ИБРАГИМҰЛЫ