Мәңгілік елдің өнерлі өрендері

Мемлекет басшысы Қасым-Жомарт То­қаев 2022 жылды «Балалар жылы» деп жария­­ла­ды. «Балалар – мем­ле­­ке­тіміздің жар­қын бо­лашағының кепілі. Өс­келең ұрпақ­тың үй­лесімді дамуы мен ба­қытты ба­ла­лық – бұл біздің жалпыұлттық мін­­­­детіміз» деді ел Пре­зиденті.

Атаулы жылды іс жүзінде балаларды қолдау мен қор­ғау жылы ретінде өткізіп, барлық салада ел бола­шақтарына баса мән берілуі тиіс. Осы ретте алдын ала қабылданған жоспар негізіндегі іс-ша­ралар ауданымызда да басталып кетті. Аудандық мәдениет үйі жанындағы өнер­паздардың қатысуымен «Мәңгілік елдің өрен­дері» атты концерттік бағдарлама өтті. Сахна шымылдығы «Балауса» ха­лықтық би ан­самблінің «Ертегілер» биімен түрілді. Ерекше ұйымдастырылған іс-шара көрерменге мерекелік көңіл-күй тар­ту етті.

Концерттік бағдарламада аудан әкімінің орынбасары Т.Нұртазаев «Балалар жылында» балаларға ерекше мән берілуі қажет екенін айтты.

– Бала – болашақ. Бала – елдің ертеңі. Алдағы жылды Мемлекет басшысы «Балалар жылы» деп жариялағаны баршамызға белгілі. Осы ретте ауданымызда түрлі іс-шаралар өткізу басталып кетті. Шығыстың ғұлама ғалымы әл-Фараби «Жас жеткіншектеріңізді көрсетіңіз, мен сіздердің болашақтарыңызды айтып берейін» дейді. Сол айтпақшы жас ұрпақ тәрбиесі – адамзаттың мәңгілік тақырыбы. Ұлттың бүгіні де, болашағы да тәрбиелі ұрпаққа байланысты. Кез келген халық ұрпақ тәрбиесін – ұлттың тағдыры, болашағы деп біледі, – деген аудан әкімінің орынбасары атаулы жылды тиімді әрі абыройлы өткізуге тілектестігін білдірді.

Ауданның жас өнерпаздары көрерменге мерекелік тартуларын ұсынды. «Туған ел», «Қазақстан – Отаным менің» патриоттық әндері хормен шырқалса, облыстық, республикалық байқаулардың жүлдегері «Балауса» халықтық би ансамблінің, «Жауқазын» би­шілер тобының өнерпаздары мың бұрала би билеп көрерменнің көзайымына айналды. Жезтаңдай әншілер М.Бақытұлы, А.Әбіл­жаппар, А.Төребеков, И.Аманжолов ән айтып тыңдарманды баураса, жас музыканттар И.Қайратқызы, Н.Бәкишев, Д.Семеновтер түрлі аспаптың «құлағында» ойнады. Ал күй тартыс пен қыз бен жігіт айтысы көрерменнің делебесін қыздырып, өнерпаздар қоше­метке бөленді. Және ауданның жас спортшылары өз өнерлерін көрсетті.

Кішкентай бүлдіршіндердің еш саспай, қысылмай үлкен сахнада жұлдыз болып жарқырағанын көрген біздер еріксіз қол соғып, керемет көңіл-күйде қалдық. Ән де, би де, күмбірлеген күй де көрерменнің жүрегіне жете білді. Сөзімізге дәлелді концерттік бағдарлама соңында залдағы қонақтардың тік тұрып өнерпаздарға қошемет көрсетуінен аңғаруға болатын еді. Балалардың өнеріне тәнті болған әрбір көрермен сол сәтте балғындардың болашағы жарқын болуын іштей тілеп тұрды.

Аружан МҰХАНБЕТҚАЛИ