Дертті жеңудің жолы – екпе қабылдау

Кеше Аудан әкімі Мұрат Ергешбаевтың төрағалығымен аппарат мәжілі­сі өтті. Мәжілісте қауіпті індетті жою ба­ғытында атқарылған жұмыстар мен екпе егу жұмыстарының барысы талқыланды.

Аудан басшысы коронавирустық инфек­ция­дан туындайтын қауіп-қатер күн са­нап артып келе жатқанына назар аударды. Сондықтан сақтық шараларын күшейту қажет­тігін ескер­тіп, дертті жеңудің ең қысқа әрі тиімді жолы – ек­пе қабылдау екенін атап өтті.

– Қауіпті індеттің тез таралып, адам өмі­ріне кері әсер етіп жатқаны бәрімізге белгілі. Сол себепті босаңсуға болмайды. Әр мекемеде сақтық шаралары, карантиндік талаптар қатаң сақталуы тиіс. Бұл ретте мониторингтік және жұмысшы топ жұмысын жандандыру керек. Екпе қабылдамаған азаматтардың мекемелерге кіруін, қоғамдық орындарға баруын шектеу тетіктерін зерттеп, ұсыныс ен­гізуді тапсырамын. Сондай-ақ ақпараттық-насихаттық жұмыстарды күшейту де күн тәр­тібінен түспеуі керек, – деді аудан әкімі.

Күн тәртібіндегі бірінші мәселе бойынша аудандық санитариялық-эпидемиологиялық ба­қылау басқармасының басшысы С.Өмірбаев пен аудандық орталық аурухана бас дәрігері Н.Мырзағалиева баяндама жасады. Сала бас­­шылары қазіргі таңда ревакцинация жұ­мыс­тарының маңызы артқанымен екпе алу­ға ха­лықтың әлі де асықпайтынын атап өт­ті. Сон­дықтан әрбір мекемеде бірінші басшылар тарапынан түсіндірме жұмыстарын кеңі­нен ұйымдастыруды ұсынды. Сондай-ақ аудан­дағы эпидемиологиялық ахуалдың күр­делі екенін айтып, әсіресе Тереңөзек кен­тінде, Қоғалыкөл, Шіркейлі, Ша­ған елді ме­кен­дерінде жағдай тұрақталмай тұр­ғанын атап өтті.

Бұл мәселе бойынша аудан әкімі тиісті кент және ауылдық округі әкімдеріне, мекеме, бөлім басшыларына қалыптасқан ахуал­ға жауапкершілікпен қарауды тапсырды. Оның ішінде білім беру саласы бойынша оқу­шылармен тығыз, тікелей қарым-қатынаста жұ­мыс істейтін педагогтардың екпе алуының ма­ңызды екені айтылды.

Мәжілістің күн тәртібіндегі екінші мәселе жергілікті қоғамдастық құрамына байланыс­ты өрбіді. Бұл мәселе жабық, яғни тек кент және ауыл әкімдерінің, бөлім басшыларының қатысуымен талқыланғандықтан, өзге мекеме басшылары мен БАҚ өкілдері қатысқан жоқ.

Ақтөре ИБРАГИМҰЛЫ