Заңдағы өзгерістер түсіндірілді

Сырдария аудандық сотының ұйымдастыруымен «Қа­зақ­с­­­­­тан Рес­публи­ка­­­сының әкімшілік рәсімдік-процестік кодексінің жалпы ережелері» тақырыбында семинар-кеңес өткізілді. Семинар-кеңеске Қызылорда облыс­тық сотының судьясы Е.Тұрбаев, аудандық сот төрағасы Р.Алдамбергенов, аудан прокурорының міндетін атқарушы Н.Қаратаев, Мемлекеттік кіріс­тер басқармасының басшысы А.Жүсіпов, аудандық полиция бөлімі­нің бастығының орынбасары Б.Қаппар, қаржы бөлімінің басшысы А.Есма­ған­бетова, құқық қорғау және жергілікті атқарушы орган басшылары, ауылдық округ әкімдері, сала мамандары қатысты.

Аудандық сот төрағасы Р.Алдамбергенов се­минар-кеңесті ашып, жүргізіп отырды. Өз кезегінде арнайы заңнамаларға өзгерістер енгізілгені жөнінде айтты. Ал Қызылорда облыстық сотының судьясы Е.Тұрбаев Қазақстан Республикасының әкімшілік рәсімдік-процестік кодексінің жалпы ережелері жа­йы жиналғандарға кеңінен мағлұмат берді.

– Әкімшілік рәсімдік-процестік кодекстің мақ­саты – азаматтардың басқарушылық шешімдер қа­былдауға белсенді қатысуына, жоғары тұрған органдар мен сотта билік органдарымен арадағы дау­­ларды қарау кезінде азаматтардың құқықтарын қорғау үшін тиімді тетіктер әзірлеуге мүмкіндік береді. Бұл заң мемлекеттік органдардың ішкі әкім­шілік рәсімдерін, оларды жүзеге асыруға байланысты қатынастарды, әкімшілік сот ісін жүргізу тәртібін реттейді. Әкімшілік рәсімдердің міндеттері жеке және заңды тұлғалардың жария құқықтарын, бостандықтары мен мүдделерін толық іске асыруды көздейді. Жария-құқықтық қатынастарда жеке және қоғамдық мүдделердің теңгеріміне қол жеткізу, тиімді және бүкпесіз мемлекеттік басқаруды, оның ішінде, адамдардың басқару шешімдерін қа­был­дауға қатысуы арқылы қамтамасыз ету, осы саладағы заңдылықты нығайту болып табылады.

Сонымен қатар, елдігіміздің беріктігін нығайту мақсатында биліктің бір тармағы ретінде бүгінгі соттар кешегі өткен билердің ісін жалғастырып келеді. Ел ішінде туындаған дауларды шешуде, оны мән-мағынасы бойынша ғана қарап қоймай, екі тараптың бітімге қол жеткізу жолдарын «Медиа­ция» институты арқылы ел арасында кеңінен насихаттауда. Ел болған соң дау-дамайсыз болмайтыны анық. Бірақ сол жанжалды ушықтырмай дер кезінде шешуге қол жеткізу жолдарын дамыту, бүгінде қай жиынның болса да басты тақырыбына айналып отыр. «Медиация» Заңы даудағы кінәлі тарапты анықтау емес, қайта дауласқандарды ымыраға шақырып, татуластыру, екі тарапты қана­ғат­тандыратын шешімге қол жеткізу болып табылады,  – дедіЕ.Тұрбаев.

Жиын соңында аталған әкімшілік рәсімдік-процестік кодексте көрсетілген талаптарды  көп­шілік өзара талқылады. Заң аясында шешілуі тиіс дау-дамайлар жөнінде пікір алмасты және сұ­рақ­тарға жауап берілді.

Балтабай ОРДАБЕКОВ