Тура биде туған жоқ
ҚР ҚМ ҚК Қызылорда облысы бойынша Қазынашылық департаменті Сырдария аудандық қазынашылық басқармасы сыбайлас жемқорлық сипатындағы құқық бұзушылықтарды болдырмау және оның алдын алу мақсатында дөңгелек үстел өткізді.
Мәжіліске басқарма қызметкерлері мен «Nur Otan» партиясы аудандық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңес төрағасы Шаһарбек Балтабайұлы қатысты.
Жиналысты ашып берген басқарма басшысы З.Рахымшаева бүгінгі іс-шараның сыбайлас жемқорлыққа қарсы іс-қимыл жөніндегі 2018-2025 жылдарға арналған іс-шаралар және биылғы жылдың жұмыс жоспарына сәйкес ұйымдастырылып отырғанын атап өтті.
Одан кейін сөз алған Ш.Нұрсейтов:
– Бүгінгі күннің басты мәселесінің бірі – сыбайлас жемқорлықты болдырмау, алдын алу, жолын кесу және онымен дәйекті түрде күресу. 2020 жылдың қорытындысы бойынша аудандағы мемлекеттік органдарда жемқорлық құқық бұзушылық орын алған жоқ. Аудандық қазынашылық басқармасында жемқорлыққа қатысты құқық бұзушылықтың алдын алу мақсатында арнайы оқу сабақтарды, осындай дөңгелек үстелдерді жиі өткізіп отырады және бұл орынды атқарылып жатқан жұмыс, – деді.
Сыбайлас жемқорлық – қоғамның ең басты қауіп-қатерлерінің бірі. Бұл кесел мемлекет пен қоғамның тұрақтылығына, ел экономикасының ілгерілеуіне үлкен кедергі келтіріп отыр. Десек те, осындай келеңсіз құбылыстармен күрес жүргізу тек сот, құқық қорғау және басқа да мемлекеттік органдардың міндеті емес, әр азаматтың парызы екенін естен шығармаған абзал.
Аружан МҰХАНБЕТҚАЛИ
