«Көшбасшы бол-2»: Белсенді жастар бас қосты

Қоғамның қозғаушы күші жас­тардың ерік-жігері болашаққа сер­пін береді. Белсенді болу ар­қы­лы тұлғалық болмысын қа­лып­­­­тас­тыратын бұл топтың өкіл­­­­дері креативті ойларымен­­ жа­­ңа­­­шылдық енгізе алады. Бұл рет­­те, аудандық жас­тар ре­­­сурстық ор­та­лығының ма­­ман­да­ры­ның ұйым­дас­тыруы­мен­­ Те­­­­рең­­өзек кенті мәде­ниет үйін­де «Көшбасшы бол-2» интен­сивті курсы өткізілді. Үш күнге созыл­­ған іс-шараға бірнеше бі­лім ордасының ұстаздары мен белсенді жастар қатысты.

Еркін форматта жүзеге асқан іс-ша­раның алғашқы күнінде көшбасшы жастар дөңгелек үс­тел барысында бас қосты. Бір-бірімен жа­қын танысып, үш топқа бөлінді. «Танысу тре­нингі» мен «Кім жылдам» ойындарында топ мү­шелері өзара бақ сынады.

Өз кезегінде жи­налғандармен «Қылмыс және қылмыстық жауапкершілік және түнгі рейд» тақырыбында ау­дандық полиция бөлімінің маманы, полиция капитаны Айгүл Нұрымбетова кездесті. Кездесуде сала мамандарымен жасөспірімдердің тәрбиесі мен қыл­мысты болдырмау мәселесі қаралды. Ақ­параттық-түсіндірме жұмыстарын жүргізген тәртіп сақшысы арнайы тақырыптық бейнероликтер ұсынды.

– Аудан бойынша 17 мектепте оқитын жас­өспірімдердің тәртібіне ата-аналар, ұс­таз­дар, құқық қорғау органдарының мамандары жауапты. Жастар арасындағы қыл­мысты болдырмау мақсатында тиісті іс-шаралар атқа­рылуы қажет. Қазіргі таң­да ұрлық жасау, бұ­зақылықпен айналысу секілді қылмыстар жеткілікті. Ата-ана бақылауынан тыс қисын­сыз әрекеттерге баратын балалар есепке алынады. Жыл көлемінде олардың жүріс-тұрысын жіті қадағалаймыз. Түнгі мезгілде рейд жүр­гізу арқылы ұстаздар қауымымен бірлесіп, жекелеген бұзақылықтардың алдын аламыз. Ең алдымен, баланың әке-шешесі мұқият ойлануы керек. Беймізгіл уақытта жасөспірімдер көшеге шықпағаны абзал. Себебі, өзінен үл­кендерге еліктеп, түрлі қылмысқа баруы мүм­кін, – деді А.Нұрымбетова.

Жастар интенсивті курстың кезекті бө­лімінде ауданға есімдері жақсы таныс мә­дениет саласының мамандарымен кездесті. Кеш қонақтары Тереңөзек кенті мәдениет үйінің мәдени ұйымдастырушылары, рес­пуб­­ликалық, облыстық, аудандық бай­қаулардың лауреаты, ән үйірмесінің же­текшісі, өңірімізге танымал әнші Ербол Бекжүнісов пен Нұр-Сұлтан қаласындағы «Наз» мемлекеттік би театрының экс-балет әртісі, би үйірмесінің жетекшісі Бақытжан Беккулиев болды. Өнер иелерінің жеке өмірі мен шығармашылығына байланысты сан түрлі сауалдарды аудандық жастар ресурстық орталығының маманы Айшат Сейтсұлтанова қойды. Сонымен бірге, талантты жігіттердің қатысуымен ойын ойнатылып, белсенді жастар ән-би өнеріне байланыс­ты пікірлерін ортаға салды.

– Ең алдымен, «Көшбасшы бол-2» ин­тен­­сивті курсы аясында кездесуге шақыр­ған ұйым­дастырушыларға алғысымды айтамын. Бала кезімізден ән айтып, түрлі байқауларға қатысуға мүмкіндік туды. Аудан көлемінде мә­дени-көпшілік іс-шараларда ән айтып, көп­шілікке таныла білдік. Қазіргі таңда шәкірт тәрбиелеп, ән өнеріне баулып жүрміз. Ке­ліншегім Айша екеуміз де ел алдында дуэт ретінде ән шырқаймыз. Көбіне лирикалық ән­дер жанымызға жақын, – дейді Ербол Бек­жүнісов.

Болашақ мамандығын би өнерімен бай­ла­­ныс­тырған Ба­қыт­жан Беккулиев қызметі жа­­йында жиналғандармен ой бөліс­ті.

– Ауылдан шыққан қарапайым жігіт ал­ғашқыда би өнерінен ешқандай хабары жоқ болатын. Ата-анам жоғарғы оқу орынына алып келгенде біз қалаған мамандыққа түсу үшін өтініш қабылдау аяқталып қалған еді. Осындай сәтсіздік орын алғанына қапаланып тұрғанымызда алдымыздан хореогра́фия ма­мандығынан беретін ұстаз жолығып, тосыннан би өнерімен айналысуға шақырды. Осыдан кейін кәсіби тұрғыдан биді меңгеріп, хо­реогра́фия саласына қызығушылық оянды. Оқуды бітіргеннен кейін Нұр-Сұлтан қа­ласында жұмыс істедім. Кейіннен туған жерге келіп, қызмет ету бақыты бұйырды, – дейді Бақытжан Беккулиев.

Екінші күн. Белсенді жастар семинар-тре­нинг барысында көшбасшы болудың негізгі қағидаттарын талқылады. Аудандық жас­тар ресурстық орталығының маманы Сәуле Сыздықова ойды дамыту, алға мақсат қоя білу, жастардың өмірге көзқарасын өзгерту, кез келген дүниеге қызығушылығын ояту мә­селелері жөнінде жиналғандарға кеңінен ақпарат берді. Қарым-қабілетті жүзеге асыру үшін күнделікті орындауға тиіс дағдыларды жастар тізбектеп шықты. Алдағы үш жылда өзінің тұлға ретінде қалыптасуына болжам жасады. Адам бойындағы енжарлық пен жалқаулықты жеңуге қатысты ой-пікір­лерімен бөлісті. Көпшілік алдына шы­ғып сөйлей білу тетігін меңгерді.

«Көшбасшы бол-2» интенсивті курсының кезекті қонақтары жиналған жастар арасында «тәтті жұп» деген бағаға ие болды. Кеш кейіпкерлері Мұхтар Ешпанов пен Динара Мұхтарова жақында отау құрды. Екеуі де аудандағы жас кәсіпкерлер ретінде былайғы жұртшылыққа танымал. Отағасы Мұхтар Ешпанов химиялық тазалау қызметімен айналасады. Яғни, автокөліктер мен жиһаздарды химиялық тазалаудан өткізеді. Ал жары Динара Мұхтарова – «Dinaros» сән салонының иесі. Бүгінде Динара Махмудқызы қыз-ке­ліншектердің көрікті болуы үшін сан түрлі қызметті ұсынып келеді. Жеке кәсіпкерлермен кездесуде аудан жастары «тәтті жұптың» қалай танысқаны жөнінде, алғаш кездесулері туралы сұрап білді. Отбасылық өмірдің қы­зықтары мен ерекше сәттерге қаныққан ұс­таздар қауымы жарасымды жұпқа тәттілер ұсынды.

– Біз ең алғаш аудандық жастар ресурс­тық орталығының кәсіпкерлерге арнап ұйым­дастырған жобасы аясында таныстық. Енді кә­сібін бастап жатқан кісілерге жетекші ре­­тін­де бағыт-бағдар бердік. Осылайша, әлеу­меттік желі арқылы таныстығымыз бе­кіп, екі жыл көлемінде қыз бен жігіт болып жүрдік. Биыл Алланың қалауымен отбасын құрып, үлкен өмірге қадам бастық. Екеуміздің де мамандықтарымыз мүлдем басқа. Бірақ, кә­сіпкерлік бағытында табыс тауып, өз биз­несімізді дамытудамыз. Алдағы уақытта аудан тұрғындарына сапалы, үйлесімді жұмы­сымызды ұсынамыз, – дейді жарасымды жұп.

Қорытынды бөлімде үш топқа бөлінген жас­тар өз өнерлерін көрсетті. Ән айтып, би биледі. Интеллектуалдық ойындар ұйым­дастырды. Семинар­дан алған әсер­лерімен бөлісті. Аудандық жастар ресурстық орта­лығының директоры Ғани Ораловтың «Ал­ғыс хатына» ие болды.

Балтабай ОРДАБЕКОВ