Тәуелсіздік тұмары
4 маусым – Қазақстан Республикасының мемлекеттік рәміздер күні қарсаңында «Қызылорда облысының мемлекеттік архиві» КММ-нің Сырдария аудандық филиалы «Рәміздер – тәуелсіздік тұмары» атты дөңгелек үстел өткізді.Карантиндік талаптарды сақтай отырып жүргізілген басқосудың негізгі мақсаты – Қазақстан Республикасы мемлекеттік рәміздерінің басты құндылық екендігін жан-жақты түсіндіре отырып, адамдардың бойына патриоттық сезім қалыптастыру болды. Дөңгелек үстел барысында қатысушыларға мемлекеттік рәміздердің мемлекеттік мекемелерде орналастырылуы, қорғалуы туралы түсінік берілді. Сондай-ақ, туған жерге, елге деген сүйіспеншілікке баулу, мемлекеттік рәміздерге зор құрметпен, шынайы сезіммен қарауға дағдыландыру – дөңгелек үстелдің басты тақырыбы болды.
Аталған іс-шараға аудандық мәслихаттың аппарат басшысы Г.Божан, аудандық ішкі саясат бөлімінің жетекші маманы Т.Нұрмағанбетов және аудандық филиал қызметкерлері қатысты.
Еркін пікір алмасу форматында өткен дөңгелек үстелді аудандық филиалдың басшысы Р.Турикбаев ашып, қатысушыларды іс-шара мақсатымен таныстырды.
– Бүгінгі дөңгелек үстел Қазақстан Республикасының Рәміздер күніне арналады. Егемендік алғаннан кейін еліміз 1992 жылы 4 маусымда өзінің Мемлекеттік рәміздерін бекітті. Бұл күн Қазақстан Республикасы тарихындағы ерекше мәртебелі күн ретінде мәңгі есте қалады. Мемлекеттік рәміздер – Тәуелсіздігіміздің ажырамас бөлігі, сондықтан тәуелсіздік белгісі ретінде ерекше қадірленіп, оларға биік мәртебе беріледі. Тәуелсіз мемлекеттің әрбір азаматы мемлекеттік рәміздерімізді құрметтеп, қастерлеу азаматтық парызы екендігін түсінуге тиіс, – деді аудандық филиал басшысы.
Сөз алған аудандық мәслихат аппаратының басшысы Г.Божан:
– Бүгінгі жастарды патриоттыққа тәрбиелеудің түрлі жолдары қарастырылып келеді. Соның бірі жастар арасында рәміздерімізді насихаттау. Рәміз – бұл мемлекеттің төлқұжаты, – деп, ұйымдастырылған шараның маңыздылығына тоқталса, ішкі саясат бөлімінің жетекші маманы Т.Нұрмағанбетов:
– Еліміздің шекарасын қалай кірпік қақпай күзетер болсақ, мемлекеттік рәміздерімізді де солай қадірлеу әр адамның қасиетті парызы болып саналмақ, – деп, мемлекеттік мекемеде рәміздердің орналасу, қорғалуы турасында қатысушыларды ақпараттандырды. Нормалар сақталмаған жағдайда әкімшілік айыппұл салынатынын мәлімдеді.
Дөңгелек үстелге қатысушылар рәміздер – мемлекет тәуелсіздігінің тірегі екенін айтып, өзара пікір алмасты.
Аружан МҰХАНБЕТҚАЛИ
