Тәлімі мол тағылымды іс-шара

Апта ағымында №137 орта мектебінде Сәкен Сейфуллин ауылдық қоғамдық кеңесінің ұйымдастыруымен «Ерлікке тағзым» тақырыбында майдангер ұстаз Мансұр Есназаровқа арналған мектепішілік эссе байқауы қорытындыланды. Оған Сәкен Сейфуллин ауылдық қоғамдық кеңес төрағасы Сайлау Нұртаев, еңбек ардагері Итемір Пазылов, майдангер ұстаздың қызы Рахия Есназарова, айтыскер ақын Нұрмат Мансұров және байқау қатысушылары қатысты.

Өз заманында ерлік пен елдіктің мәселесін көтерген, білім саласының дамуына сүбелі үлес қосқан Мансұр Есназаров жайында мектеп оқу­шылары тереңнен ізденіп, кейіпкердің айшықты болмысын аша түскен. Өзі туған ауылға білім ошағын салып, онда 10 жылға жуық басшылық жасаған еңбек ардагерін талапкерлер жан-жақты суреттеген.

Ізгілікті іс-шарада білім қайраткері Мансұр Есназаров негізін қалаған орта мектептің тарихы мен жетістіктер бейнебаян ар­қылы көрсетілді. Сонымен бірге мектеп түлегі Аяжан Қайратқызы түсірген білім ұясының 90 жылдық мерейтойы жөнінде бейнебаян да көпшілік көңілінен шықты. Өз кезегінде қоғамдық кеңес төрағасы Сайлау Нұртаев, еңбек ардагері Итемір Пазылов ұстаздың елеулі еңбектерін тілге тиек етіп, тағылымға толы естеліктерін бөлісті. Келесі жылы 110 жылдығы тойланатын Мансұр Есназаров құрметіне ауылдағы орта мектепке есімін беру жөніндегі бастамаға ауыл тұрғындары қолдау көрсетіп келе жатқандығын жеткізді. Ал ұла­ғатты ұстаздың ізбасары Рахия Есназарова әулет мүшелерінің педогогикалық еңбек өтілі 560 жылды құрайтындығын, әке жолын жалғастыру ұрпақтарына аманат екендігін айтты. Ақын Нұрмат Мансұров құр­метке лайық қайраткердің еңбегі алдағы уақытта кеңінен дәріптеле беретіндігін жеткізді.

Байқау қорытындысында 5-7 және 8-11 сынып оқушылары арасында жеңімпаздар мен жүл­дегерлер анықталып, арнайы «Диплом» және бағалы сыйлық табысталды.

Айта кету керек, Есназаровтар әулетінің атынан №137 орта мектепте география пәні сыныбын жасақтау үшін балаларды оқытуға арналған құрал-жабдықтар тапсырылды. Баланың білімін дамыту мақсатында пайданалатын құрал-жабдықтар сыйлағаны үшін көпшілікке пән мұғалімі Мұратбек Қарсақбаев алғыс айтты.

Балтабай ОРДАБЕКОВ