– 2020 жылғы аудан дамуының негізгі бағыттары Мемлекет басшысы Қасым-Жомарт Тоқаевтың «Жаңа жағдайдағы Қазақстан: іс-қимыл кезеңі» атты Қазақстан халқына арнаған Жолдауына сәйкес бел­гіленді. Онда пандемияға қарамастан аза­маттардың әлеу­меттік әл-ауқатын жақ­сартуға басымдық берілді. Сондай-ақ жаңа жағдайдағы эконо­микалық дамуға серпін жасалды, – деген аудан басшысы салалар жұмысын саралады.

Ауданның дамуы бюджеттің ұлғайып, салық түсімдерінің орындалуымен тығыз байланыс­ты болса, өткен жылы аудан бюджеті­нің түсімдер болжамы нақты 101,7 пайызға орындалған. Ал салықтық емес түсімдер 222,0 пайызға, негізгі капиталды сатудан түсетін түсімдер 134,3 пайызға орын­далып отыр. Биылға бекітілген аудан бюд­жетінің көлемі – 10 млрд. 896,5 млн. теңге. Оның негізгі шығындарын, яғни 77 пайызын әлеу­меттік салаға бағыттау көз­делген.

2020 жылы аудан экономикасына ті­келей ықпал жасайтын өнеркәсіп саласында оң динамика қалыптасқан. Ауданның өнеркәсіп кә­сіп­орындарында өнім өндіру 51,1 пайызға, ал өңдеу саласында өнім өндіру 38,6 пайызға артқан. Сонымен қатар былтырғы жылы аудан экономикасына 36 млрд. теңге инвес­тиция тартылып, 7 млрд. теңгеден астам құрылыс жұмыстары атқарылыпты.

Өткен жылғы қиыншылықтарға қара­мастан ауыл шаруашылығының жалпы өнім көлемі 16,3 млрд. теңгені құрап, 1,8 пайызға ұлғайған. Карантиндік шектеулер мен су тапшылығы орын алса да аудан диқандары 21 мыңнан астам гектарға күріш дақылын орналастырып, әр гектарынан орташа 63,5 центнерден, барлығы 135 мың тонна астық жинап, рекордтық өнімге қол жеткізді.

Биыл су тапшылығы өткен жылға қара­ғанда еселенеді деген қауіп бар. Соған бай­­­ла­нысты суды аз қажет ететін майлы, көкөніс-бақша, мал азығы дақыл­дарына басымдық берілмек. Осы мақсатта Ің­кәр­дар­ия ауылында 10 гектар жерге заманауи технологияларды пайдаланып, бақша дақыл­­­­­дарының тұқымын өндіру және өсіру жүзеге асырылады. Сондай-ақ ауыл шаруа­шылығын әртараптандыруды жандан­дыру мақ­сатында қаржы бөлініп, Терең­өзек кенті, А.Тоқмағамбетов және Қоға­лы­­көл ауылдық округтерінен 18,5 гектар жер учас­кесі аграрлық-индустриалдық аймақ бо­лып белгіленген.

Елді мекендерге аяқ суды жеткізе оты­рып, Мемлекет басшысының елді мекендерде 15 млн. ағаш отырғызу тапсырмасына сәйкес аудан аумағында алдағы 5 жылда 60 гектардан астам жерге 84 мың түп ағаш егу жоспары да бар.

Экономиканы өркендетудің бірден-бір жолы кәсіпкерлікті дамыту екені анық. Қазіргі нарықтық экономика кезеңінде елі­мізде кәсіп ашуға мол мүмкіндіктер жасалуда. Өткен жылы ауданда тіркелген шағын және орта кәсіпкерлік субъектілерінің са­ны 10,9 пайызға, ал жұмыс жасайтын субъектілердің саны 10,2 пайызға өскен. Жаппай кәсіпкерлікті дамыту аясында мемлекеттік бағдарламалар арқылы өт­кен жылы 1,5 млрд. теңгенің 538 жобасы қаржыландырылып, 540 жаңа жұмыс орны құрылған. Ал облыстың экономикалық да­му жоспарын іске асырудың Жол картасына аудан бойынша 6 жоба енгізіліп отыр.

Кәсіпкерлік бағытта аудан орталығында «Аққұм Жер» серіктестігі құны 80 млн. теңгені құрайтын «Ұн шығаратын зауыт» жобасын іске асыруда. Бүгінгі күні аталған жобаның құрылыс жұмыстары толық аяқ­талып, Қостанай облысынан шикізат күті­луде.

Аудан басшысы халықты баспанамен қамтамасыз ету күн тәртібінен түспейтінін атап көрсетті. Бұл бағытта ауданда ау­қымды жұмыстар атқарылуда.

– Өткен жылы «Жұмыспен қамтудың 2020-2021 жылдарға арналған жол картасы» аясында Тереңөзек кентінде көпқабатты тұрғын үйлер бой көтеріп, аймақ басшысы Жаңа жыл қарсаңында 42 отбасыға баспана кілтін салтанатты түрде табыс етті. Бұл бағыттағы жұмыстар алдағы уақытта да жалғасын тауып, тағы да көпқабатты 2 тұрғын үй салу жоспарлануда. Оған қоса, осы жылы республикалық бюджеттен 12 елді мекенде 35 тұрғын үй құрылысын жалғастыруға және аз қамтылған көпбалалы отбасыларына 10 тұрғын жайын сатып алуға қаржы бөлініп отыр. Жалпы, биылғы жылы мемлекет есебінен 81 отбасы баспаналы болады деген жоспар бар, – деді аудан әкімі Талғат Тұрсынұлы.

Мұнан соң аудандағы инфрақұрылым­дық жұмыстарға тоқталды. Атап айтқанда, ауданда халықты таза ауыз сумен қамта­масыз ету толығымен шешілген. Жол мәсе­лесі де кезең-кезеңімен жақсарып келеді.

Негізінен, аудан бойынша автомобиль жолдарының жалпы ұзындығы 494 ша­қырымды  құрайды. Ауданның жолдар желісін дамытуға өткен жылы республикалық және жергілікті бюджеттен барлығы 2,6 млрд. теңге қаржы бағытталған. Аудандық маңызы бар жолдар мен елді мекен көшелерінің 70,1 шақырымы, яғни 51 жол және көшелер жөндеуден өткізілген. Нәтижесінде, жақсы және қанағаттанарлық жағдайдағы жергілікті маңыздағы автомобиль жолдарының үлесі 92 пайызға жетсе, ішкі жолдардың 83 пайызы асфальтталған.

Ал биыл ауданда 19,7 шақырым жол ор­таша жөндеуден, 2 шақырым жол күрделі жөндеуден өткізілмек. Елді мекендерде 3,37 шақырымды құрайтын 4 көше жөндеуден өте­ді.

Биылдан бастап аудан орталығы көгілдір отынға қосылды. Мұны тұрғындар көптен күтті. Қазіргі таңда тұрғын үйлерге газ кіргізу қызметтерін аудан орталығында 5 кәсіпкер атқаруда. Бүгінде 292 тұрғын үй және 8 әлеуметтік нысан газдың игілігін көруде. Ендігі кезекте Тереңөзек кентін газдандыру жобасынан қалып кеткен және жаңадан са­лынған тұрғын үйлерге газ құбырын жеткізу жұмыстары жүргізілуде екен. Сондай-ақ А.Тоқмағамбетов, Қалжан ахун, С.Сейфуллин, Шаған елді мекендеріне жүргізілетін газ құ­бырлары және кварталішілік газ құбырлары желісі құрылысының» жобалық сметалық құ­жаттарын әзірлеуге жергілікті бюджеттен қаржы бөлініп, бүгінде мемлекеттік сатып алу жұмыстары атқарылуда.

Брифингте аудан әкімі халықты жұмыспен қамту, білім, денсаулық, мәдениет, спорт, жастар саясаты мен қоғамдық қауіпсіздік салаларындағы атқарылған жұмыстарды атап өтті.  Сонымен бірге қауіпті індетке қарсы күрес жүргізу үшін екпе егу жұмыстары жөнінде ақ­парат берді. Ауданда коронавирус инфекциясына қарсы «Спутник V» екпесін салу жұмысы 9 наурызда басталды. Ресейлік бірінші, екінші типтік вакцинасының 200 дозасы жеткізіліп, аудан әкімі бастап ерікті түрде екпе салдырды. Бүгінде бірінші типтік екпенің 100 дозасы толығымен салынып біткен. Жалпы, аудан бо­йынша 2021 жылға коронавирус инфекциясына қарсы бірінші кезекте 1481 тұрғын егілуге жос­парланып отыр. Олардың қатарында медицина, халықпен тығыз жұмыс жасайтын мекеме қызметкерлері бар.

Баспасөз мәжілісінде аудан басшысы ау­дандағы жер мәселесіне де тоқталып өтті.

– Ауданда қоғамдық-саяси ахуал тұрақты сипатталады. Дегенмен бүгінгі таңда аудан бойынша жер мәселесі өзекті болып отыр. Ауданға қарасты Шаған, Қоғалыкөл, А.Тоқмағамбетов елді мекендерінде егіс­тік және жайылымдық жер үлестерін шаруа­шылықтан бөліп алуға қатысты сот процестері жүргізілуде. Бұл мәселе бойынша аудан әкімдігі, облыстық және аудандық прокуратура, облыстық жер басқармасының қатысуымен бірнеше рет қолданыстағы заңдылықтар аясында түсіндірме берілді. Бұған қатысты бар­лық мәселе қолданыстағы заң талаптарына сәйкес жүргізіледі, – деді аудан әкімі Талғат Тұрсынұлы.

Брифингте атқарылған жұмыстарды атап өткен аудан басшысы журналистердің сауалдарына жауап берді.