Мақтаулы өнер ұжымы
Өткен жыл өз ерекшелігімен ел есінде қалғаны белгілі. Жылдың атаулы күндері аясында облыс мәдениетінде тың серпіліс байқалды. Соның бірі – облыстық халық шығармашылығын дамыту және мәдени-продюсерлік орталығының ұйымдастыруымен өткен «Үздік клуб – 2020» байқауы. Байқау Әбу Насыр әл-Фарабидің 1150, Алтын орда мемлекетінің 750, қазақтың ұлы ақыны Абай Құнанбайұлының 175 жылдық мерейтойы аясында ұйымдастырылды. Облыстық байқауға ауданның атынан Ақжарма ауылдық мәдениет үйі қатысты. Мәдениет қызметкерлері ел мәдениетін дамытуда жасалған жұмыстары мен жетістіктерін көрсетті. Ауыл мәдениетінің жұмысын жан-жақты көрсетуге облыстық халық шығармашылығы орталығының және аудандық мәдениет үйінің әдістемелік бөлім қызметкерлері бағыт-бағдар беріп, қолдау көрсетті. Нәтижесінде Ақжарма ауылдық мәдениет үйі ІІІ дәрежелі дипломмен марапатталды.
Бибісара ЖАНӘЛІ
