Бүкіл әлем сөйлейді нақты ғылым тілінде
Білім саласында пәндік бірлестіктердің атқаратын жұмыстарының маңызы зор екендігі белгілі. Онда ұстаздар бір-бірімен тәжірибе алмасып, соның нәтижесінде оқушыларға сапалы білім береді. Әдістемелік бірлестік жұмысының негізгі түрлерінің қатарында пән апталықтарын өткізу бар. Осы орайда, №132 Т.Айтбаев атындағы орта мектепте апталықтар өткізу үрдіске айналған. Мәселен, «Бүкіл әлем сөйлейді нақты ғылым тілінде» тақырыбында қашықтан математика, информатика және физика пәндерінің апталығы өткізіліп, онда оқытудың заманауи тәсілдерін қолданылған. Сол арқылы оқушылардың ғылымдарға деген қызығушылықтарын арттыру көзделген.Апталықтың ашылуында «Әлемнің ғажайып үш тірегі» тақырыбында оқыту сағаты ұйымдастырылған. Тәжірибелі ұстаздар Тұрсынкүл Қанафина, Мұрат Қаймолдаев, Нұрсұлтан Есжанов оқушыларға нақты ғылымдардың өмірге қажеттілігін ұғындыра отырып, логикалық тапсырмалар берді. Ал жас мұғалімдер Айнұр Қайбылдаева, Батыржан Найманов, Сырым Анафияев мектеп оқушыларымен онлайн форматта математика, информатика және физика пәндері бойынша түрлі деңгейдегі тапсырмаларды орындады. Келесі кезекте математика пәнінің мұғалімі Гүлзат Зұлхарнаева «Рационал сандарға амалдар қолдану» тақырыбындағы ашық сабақты «Zoom» платформасымен өткізді. Мұғалімнің тақырыпты ашу барысында қолданған әдістері оқушылардың жас ерекшеліктеріне сай әрі тақырыпты ашуға ыңғайлы болды. Соның ішінде, оқушылардың зейінін анықтау үшін «Миға шабуыл» стратегиясы нәтижесін көрсетті. Сондай-ақ «Квадрат теңдеулерді шешу» тақырыбындағы Мәрзия Ағатаеваның сабағында теңдеулерді шешудің түрлі әдіс-тәсілдері қолданылды.
Мектептің физика пәні мұғалімдері де оқушыларға заттардың қасиеті мен қозғалыс заңдарын зерттейтін ғылымды үйретті. Атап айтқанда, физика пәнінің мұғалімі Үміт Жандарбекова «Жұлдызды сағат» тақырыбында сыныптан тыс іс-шара және «Инерция құбылысы» тақырыбында ашық сабақ өткізді. Ал Дана Ашықбаева «Айнымалысы бар өрнек» тақырыбындағы оқыту сағатында оқушыларыдың функционалды сауаттылығын арттыруға байланысты көптеген тапсырмаларды орындатты. Оған қоса физика пәнінің мұғалімі Гүлмира Нұрханова ұйымдастырған «Математикалық квест» логикалық ойын сайысы жаңаша үлгіде өтті. Онда оқушылардың білімділігімен көзге түсті. Осындай біліктілік сабақтарында белсенділік танытқан оқушылар «Алғыс хат» пен сертификатқа ие болды.
Апталық барысында мұғалім мен оқушы арасындағы байланыс ретінде негізінен «Kundelik.kz», «Bilimland», «Zoom» платформалары қолданылды. Бүгінде карантиндік шектеулерге байланысты білім ошағының кейбір сыныптары сабақты қашықтан оқуға көшкен. Соған қарамастан оқушылардың білім игеруге деген құштары зор.
Жұлдызай АНШАЕВА
