Алыптар шыққан қасиетті мекен

Қоғалыкөл атты көлдің жағасында орналасқан бұл мекеннен өнердің талай алыптары шыққан. Қазақ театрының анасына айналған Сабира Майқанова, атақты Қожықовтар мен Лапиндердің өмірі өнеге болып қала береді. Қаламы жүйрік Әскербек Рахымбекұлы мен Қайырбек Мырзахметұлы да осы ауылдың төл тумасы. Өнердің өрендері шыққан елдегі мәдениет ошағы жаңа әрі әсем ғимараттар қатарында. 2012 жылы пайдалануға берілген нысанды бүгінде отыз жыл еңбек өтілі бар Ләззат Сапарбаева­ басқарады. Ұжымда 10 қызметкер еңбек етеді. Ауыл халқына 5 үйірме өз жұмысын жүйелі жүргізуде.

«Дарын» ән үйірмесінің жетекшісі Райхан Матығұлқызы мәдениет сала­сын меңгерген жоғары білімді маман. Оқу­шылардың музыкалық қызығу­шы­лығын арттыру, сахна мәдениетін қа­лыптастыру бойынша жұмыс жасайтын ұстаздың шәкірттері талай өнер додаларында топ жарып жүр. Халықаралық, республикалық байқаулардың жеңімпаз­дары кәсіби өнер маманының бағытымен жүріп, биік шыңдарды бағындыруда. Мұнан бөлек мәдениет ошағында «Көр­кем сөз», «Сурет» және «Ардагерлер» үйірмесі жұмыс жасайды.

2019 жылдан басталған «Сурет» үйірмесінің жетекшісі Нұргүл Жұма­таева да білікті маман. Былтыр ғана ашылған үйірме оқушылары облыстық байқаулардан жүлдемен оралған. Атап айтқанда, Ә.Қастеевтің 115 жылдығына арналған «Суретші болғым келеді» атты жас суретшілер байқауынан үйірме мүшесі Қымбат Смағұлова жүлделі ІІІ орынмен оралды. Ал, «Көркем сөз» үйірмесіне же­­текшілік ететін Күлшара Сарбасова­ның шәкірттері Е.Мұхитдинов, Ә.Зулпар, С.Кәрім өлең өлкесінде ауылдың абыро­йын асырып жүр.

Мәдениет үйі жанындағы кітапханада бүгінде 25 628 кітап қоры бар. Биылғы жылы 83 жаңа әдеби кітаппен толықты. Кітапханашы болып қызмет етіп жүрген Нұргүл Серікболқызы осы ауылдың төл тумасы. Оның айтуынша, оқыр­мандардың соңғы уақытта Абай шығармаларына деген сұранысы мен қызығушылығы артқан. Жоғары білімді маман тек кітапхана ісімен ғана шұғылданбайтын көрінеді. Қосымша мерзімді басылым­дардың әрбір материалдарының элек­трон­ды нұсқасын енгізіп, оқырман сұра­ған мақаланы жедел тауып беруге дағды­ланған екен.

Иә, қасиетті Қоғалыкөлдің топыра­ғында дүниеге келгендер өнерден алыс болуы мүмкін емес-ті. Себебі, алыптар туған мекеннен тараған қасиет ұрпақтан-ұрпаққа беріліп, бұл топырақтан түле­гендер ерекше дарынымен танылуда.

Майя ҚОЖАБАЙ