Кент – аудан айнасы
Тереңөзек кенті – Сырдария ауданының айнасы. Ауданға келген қонақтар ауданның тыныс-тіршілігін, даму деңгейін, тұрғындардың тұрмыс-салтын кенттің келбетіне қарап біледі. Ауылдық округтермен салыстырғанда кенттің жұмысы өте ауқымды, шешуін күткен мәселе де көп. Дегенмен соңғы жылдары кентті дамыту бағытында жүйелі жұмыс жүргізілуде. Ол тұрғындардың көз алдында. Аудандық басылым арқылы кент тұрғындарына қоғам үшін қажетті және бірлесе атқарылатын жұмыс жөнінде ой бөлісуді жөн көрдім.Әрине, жылдың қай мезгілі болмасын кент әкімі аппаратының қызметкерлері тұрғындардың игілігі мен қолайлы өмір сүруі үшін тынбай еңбек етіп келеді. Күннің ыстығында жұмысшылар гүлзарларды суарып, баптаса, күннің суығында қар күреп, жолдарды тазартады. Мұнан бөлек қоғамдық орындағы тазалықты қамтамасыз ету бағытында да күнделікті жұмыс жүргізілуде. Көшедегі, әсіресе көп қабатты тұрғын үйдің маңындағы қоқыс таңертеңгілік тазартылып, арнайы полигонға апарылуда. Бұл жұмыстың қиындығы мен ауырлығын тек сол жұмысты атқарған адам ғана түсінеді.
Жыл сайын кент орталығында сенбілік қарқынды түрде жүргізілетін. Биыл төтенше жағдайға байланысты сенбілік кейінге шегерілді. Бұл кенттің тазалығына тікелей әсер етіп, жұмысшылардың жұмыс жүктемесі де артты. Десе де біз өз міндетімізді сапалы әрі уақытылы орындау үшін аянбаймыз. Осы ретте айтпағымыз – кенттің кейбір тұрғындарының тазалыққа немқұрайлы қарайтындығы. Қоқысты кез келген жерге төге салу, күл үйінсін көше бойына жинап қою, мал қорадан шыққан көңді де орынсыз жерге төгіп, ластауы – кенттің келбетіне кері әсер етуде.
Аудандық полиция бөлімімен бірлесіп санитарлық тазалықты қамтамасыз ету мақсатында рейдтік іс-шаралар ұйымдастыруды қолға алдық. Тұрғындарға түсіндірме жұмыстарын жүргізіп, қоғамдық ой-сананы жаңғырту бағытында іс-шара ұйымдастырылды. Бұл іске аудандық тауарлар мен көрсетілетін қызметтердің сапасы мен қауіпсіздігін бақылау басқармасы мен аудандық редакция қызметкерлері де үлес қосып келеді. Мұнан бөлек «Таза аула» байқауы да өтті. Ауласын таза ұстап, көрші-көлемге үлгі көрсетіп жүрген отбасылар қоғамдық комиссия мүшелерінің ұсынысымен аудан әкімінің Алғыс хатымен және бағалы сыйлықпен марапатталды. Алдағы уақытта да мұндай іс-шаралар ұйымдастырылатын болады.
Қазір көктемнің соңғы айы. Жұртшылық есік алдына бау-бақша егіп, көшет отырғызып, абаттандыру жұмысымен айналысуда. Көшеге іркіліссіз аяқ су келді. Кейбір көшенің тұрғындары аяқ судың қадірін түсінбей, өз сағасын тазартуға құлықсыз. Ал оның салдарынан су көшеге кетіп, автокөлік пен жаяу жүргіншіге қолайсыздық туғызуда. Бұл мәселе тұрғындардың «барлығын әкімдік атқаруы керек» деген жаңсақ пікірінен туындап жатқаны анық. Әрине әкімдік бұл істерді атқарады, бірақ қоғам үшін қажетті ортақ іске жекелеген азамат та атсалысып, жауапкершілікпен қарау керек. Түптеп келгенде, бұл туған жерге деген құрмет, сүйіспеншілік және оның дамуына қосылған үлес. Елбасының: «Ұлтты ұлы ету – ауылды түлетуден» басталады деген қанатты сөзі бар. Сондықтан әр азамат өзі туып-өскен, ауасын жұтып, нанын жеген, бір сөзбен айтқанда, адам болып қалыптасқан ортасының тазалығына құрметпен қарау керек. Осы мақаланы оқып, бір-екі тұрғын қолға күрек-кетпен алып, өз ауласын, көшесін ретке келтіруге кіріссе, біздің еңбегіміздің еш кетпегені деп білеміз.
Тағы бір айта кетерлігі, кентте сауда нысандары да көп. Олар халыққа өз қызметін ұсынып, азаматтарды жұмыспен қамтып, сол арқылы нәпақа тауып, мақсатын жүзеге асыруда. Кәсіпкерлерді де сауда нысандарының алдын таза ұстауға үндейміз. Бұл кәсіпкерлердің өздері үшін де қолайлы болмақ. Тұтынушы таза дүкенге барып сауда жасағысы келеді емес пе?!
Бүгін кенттің экономикалық дамуына тоқталған жоқпын. Тек қарапайым тыныс-тіршілігі мен күнделікті атқарылатын жұмыстарды атап өттім. Кент әкімі емес, кент тұрғыны ретінде айтар болсам, ауданның көркіне көрік қосу, шырайын келтіру тереңөзектік әрбір азаматтың міндеті дер едім. Көшесінің, ауласының тазалығына немқұрайлы қарамай, қоғам алдындағы жауапкершілікті тереңнен түсінетін азаматтарға алғыс айтамын.
Кенттің барша тұрғынын бірлесе еңбек етіп, аудан айнасы саналатын кентті көркейтуге үлес қосуға шақырамын.
Нұржан БИСЕМБАЕВ,
Тереңөзек кентінің әкімі
Тереңөзек кентінің әкімі
