Талап барлығына бірдей
Елімізде коронавирус індетінің өршуіне байланысты Мемлекет басшысы Қасым-Жомарт Кемелұлы Тоқаев төтенше жағдайдың қолданысын ұзарту туралы жарлыққа қол қойған болатын. Төтенше жағдай кезінде жергілікті тұрғындардың түн мезгілінде жүруін шектеу мақсатында күн сайын аудан әкімдігінің ұйымдастыруымен рейд жүргізілуде. Рейд барысында арнайы топ мүшелері бірнеше бағытта тұрғындарға түсіндірме жұмысын жасауда. Әр көшенің бойынан жаяу жүргіншілер мен автокөлік тізгіндеген азаматтар кездесуде. Олардың бағыты біреу, айтар себептері көп. «Сақтансаң, сақтармын» деген қатаң қағиданы ұстанбаған олардың кейбірі топ мүшелеріне наразылық танытады. Немқұрайлылыққа бой алдырып, тәртіпке бағыну керектігін естен шығаруда. Кейбір жағдайда жекелеген азаматтар топ мүшелеріне қолдау көрсетіп, ахуалдың күрделенуіне жол бермеуге үндейді. Талап барлығына бірдей болғандықтан шектеу шараларына мойын ұсыну керек.
Төтенше жағдай режимін бұзған азаматтарға құзырлы орган тарапынан тәртіптік шара көрінуде. Беймезгіл уақытта қоғамдық орында ережені бұзғандар Заң жүзінде жазалануда. Ел көлемінде ахуалдың тұрақтануына белгіленген уақытта үйден шықпау септігін тигізеді. Айта кету керек, барлық адам қойылған талапты орындаған жағдайда вирустың таралуы бәсеңдейді.
Балтабай ОРДАБЕКОВ
