Аудандағы ахуал күнделікті бақылауда

Мемлекет басшысы Қасым-Жомарт Тоқаев төтенше жағдай режимін қамтамасыз ету жөніндегі  мемлекеттік комиссияның  кезекті отырысында  коронавирус пандемиясының зардабын бүкіл дүние жүзі  тартып отырғандығын жеткізді. Қазіргі таңда  еліміз бойынша төтенше жағдай мерзімі  айдын аяғына дейін ұзартылды.  Қарқынды түрде  тиісті сала мамандары жұмылдырылып, індеттің өршуіне жол бермеуге жұмыс жасаудамыз.  Бүгінгі ахуал бойынша  Аманкелді ауылына қатаң шектеу қойылды.  Бұл вирус ошағынан анықталған  жағдайлардың көбеюіне байланысты  қабылданған шешім. Өз кезегінде аудан тұрғындары қатаң талапты орындап, үйден шықпаған жөн. Қай кезде де немқұрайлылық жақсылыққа апармайтынын көріп жүрміз. Сондықтан барынша карантин уақытында сабырлық танытайық.

Мемлекет басшысы карантин шараларының  орындалуы қатаң бақылауда болу керектігін ескертті. Аудандағы ахуал күнделікті бақылауда. Халық арасында түсіндірме жұмыстарын күшейттік.  Қауіпті індетті алдын алу және таралуын болдырмау мақсатында халық көп шоғырланатын мекемелер алдына арақашықтықты сақтау белгілерін ақ түсті бояу арқылы белгіледік. Тосқауыл бекетіндегі қызметкерлер  тәулік  бойы кезекшілікпен жұмыс жасауда.  Аудан әкімдігінің тарапынан  көліктердің қозғалысына  бақылау күшейтілді. Тұрғындардың тосқауыл бекеттерінен  кіріп-шығуға шектеу қойылды. Бұл ретте  аудан тұрғындары   орын алған жағдайларға байланысты  түсіністік танытса игі.    

Қайрат ҚУАНДЫҚОВ,

аудан әкімі аппаратының жұмылдыру дайындығы және аумақтық қорғаныс бөлімінің басшысы