Тіршілік тынысы Сырдария аудандық қоғамдық-саяси газет

№ 96 газет

04 желтоқсан 2021 ж.

№ 95 газет

01 желтоқсан 2021 ж.

№ 94 газет

27 қараша 2021 ж.

Жаңалықтар мұрағаты

«    Желтоқсан 2021    »
ДсСсСрБсЖмСбЖс
 12345
6789101112
13141516171819
20212223242526
2728293031 
» » Газ алғаш қай көшеге барады?

Газ алғаш қай көшеге барады?

«Газ ауданға биыл келеді ме?», «Ең бірінші қай көшенің тұрғындары көгілдір отынның игілігін көреді?», «Газдың бағасы қанша теңге болады екен? Ол көмірден арзан ба?». Бұл аудан тұрғындары арасында жиі көтеріліп жүрген сұрақтар. Тұрғындар арасында талқыланып жүрген сауалдарға жауап іздемек мақсатта аудандық тұрғын-үй коммуналдық шаруашылығы, жолаушылар көлігі және автомобиль жолдары бөлімінің басшысы Ержан Бахтияровпен сұхбаттасқан едік.
– Ержан Бахтиярұлы, газдандыру мәселе­сінің маңызды екенін жақсы білесіз. Бұл тұрғындардың да көптен күткен жаңалығы. Жалпы, аудан аумағына көгілдір отын нақты қа­шан жеткізіледі?
– Дұрыс айтасыз, ауданды табиғи газбен қамту жұмыстары – тарихи жаңалық. Тұрғындар көгілдір отынның игілігін көретін күнді асыға күтті. Осыдан екі жыл бұрын облыс әкімдігінің қолдауымен газдандыру жұмыстары қарқын алып, алғашқы жоспарлар құрылды. Жоспарлы жұмыстар негізінде Тереңөзек кентіне газ құбырларын тарту мен кварталішілік газ құбырлары құрылысын жүргізу 2019-2020 жылдарға жоспарланды. Жалпы құны 2,4 млрд теңге болатын жобаны бастауға биыл республикалық бюджеттен 525 млн теңге бөлінді. Қалған бөлігі келесі жылға жоспарланған. Жоба бо­йынша тапсырыс беруші Қызылорда облысының энергетика және тұрғын үй-коммуналдық шаруашылық басқармасы. Ал мердігер мекеме – «Алия Сервис» ЖШС болып танылған. Ағымдағы жылы 11,5 шақырымды құрайтын жоғарғы қысымдағы газ құбырларын жүргізу мен №2 және №3 газды басқару пункттерінен шығатын 24,1 шақырымды құрайтын орта қысымдағы газ құбыр­ларын орнату жоспарланған. Аталған учаскелерде орналасқан 617 тұрғын жайға газды басқару пункттерін орнату жүргізілетін болады. Алдағы 2020 жылы қалған №1, №4, №5 және №6 газды басқару пункттерінен шығатын 61 шақырымды құрайтын орта қысымдағы газ құбырлары орнатылып, сол аумақтағы жеке секторларға табиғи газ беріледі деп жоспарланған.
– Жылдың аяқталуына аз уақыт қалды. Жос­парлы жұмыстар уақытылы орындалады ма?
– Бүгінгі күнге биылғы жылға межеленген жұмыс­тардың газ құбырларын орнату жұмыстары жүргізілді. Қазіргі таңда көлденең бағытта бұрғылау (ГНБ) техникасымен темір жол өткелінің, каналдардың және автомобиль жолдарының астынан жерді тесу арқылы газ өткізу жұмыстары атқарылуда. №2 газды басқару пункті орналасқан аумақты желтоқсан айында газға қосу жөніндегі облыс әкімдігінің тапсырмасына сәйкес облыстық энергетика және тұрғын үй-коммуналдық шаруашылық басқармасы мен аудан әкімдігі тарапынан барлық тиісті шаралар атқарылуда.
– Ең бірінші көгілдір отынға әлеуметтік нысандар қосылады ма?
– Облыс әкімінің төрағалығымен 2019 жылы 22 шілдеде өткен аппараттық мәжілісте ағымдағы жылдың желтоқсан айында Тереңөзек кентіндегі әлеуметтік нысандардың қазандықтарын табиғи газ отынына кезең-кезеңімен ауыстыруды бастау тапсырылды. Осыған сәйкес аудандық бюджет есебінен бөлінген 26,4 млн теңгеге кенттегі 9 нысанның қазандықтарын табиғи газға лайықтандыру жұмыстары атқарылуда. Оның ішінде 1200 орынға арналған №36 Ә.Тәжібаев атындағы мектеп-лицей, «Нұрбөбек-Тереңөзек», «Қыз­ғалдақ» балабақшасы, аудандық және кент мәде­ниет үйі, «Неке сарайы» нысандары қамтылған. Осы жұмыс­тар ағымдағы жылдың 1 желтоқсанында толық аяқ­талатын болады.
– Әуелі кенттің қай көшесінің тұрғындары газ­дың игілігін көреді?
– 2019 жылы №2 газды басқару пункті аумағындағы «Айтек» каналының оңтүстігінде орналасқан Желтоқ­сан, Бұқарбай батыр, Достық, Н.Ергешбаев, Т.Жәрекеев, Бозжановтар, З.Лекеров, Б.Жақыпов көшесі, №3 газды басқару пункті аумағындағы Д.Қонаев, Ә.Тәжібаев, Жеңістің 50 жылдығы, Р.Алшынбаев, Ж.Құттыбаев, С.Жәкеев, Н.Ілиясов, 1 мамыр, Н.Сыздықов көшесі мен А.Иманов, А.Құнанбаев, А.Әлиакбаров көшесінің бір бөліктері газға қосылатын болады.
– Неге көшелердің бір бөлігіне ғана газ құбы­ры жүргізілген?
– Кентті газдандыру жобасы 2015 жылы әзірленген. Осы мерзімнен кейінгі салынған тұрғын үйлер жос­пар­ға енгізілмеген. Осыған байланысты арнайы құрылған жұмысшы тобымен тексеру жұмыстары жүр­гізіліп, облыстық энергетика және тұрғын үй-коммуналдық шаруашылық басқармасына жобаға енгі­зу үшін ұсынылды. Тексеру барысында кейбір учаскелерде бұрыннан болған үйлердің де жобаға ен­гі­зіл­мей кеткені анықталуда. Сондай-ақ А.Иманов, А.Құнанбаев көшесінің оң жақ қапталы №1 газды басқару пункті аумағында жататындықтан газдандыру жұмысы 2020 жылы жүргізілетін болады. Осы орайда, газ құбыры желісін жеке секторларға немесе тұрғын үйлерге кіргізу бойынша «ҚызылордаГазМонтаж» және «ҚазЭнергоПроэктСтрой» серіктестіктері өз қызметтерін көрсетуде. Аталған мекемелер газ құбырларын тұрғын үйге кіргізу құнының 25 метрге дейінгі бағасын 115,0 мың теңге деп белгілеген. Ал одан қашық болса, әр метріне 2,5 мың теңгеден төленеді. Бұл баға өзге өңірлермен салыстырғанда арзан және тұрғындар үшін тиімді болып отыр. Сондай-ақ тұрғындарға қаражатты бөліп төлеу мүмкіндіктері қарастырылған. Қазіргі таңда тұрғындардан газ құбырларын үйге кіргізу өтініштері қабылданып, тиісті жұмыстар жүргізілуде.
– Көпқабатты тұрғын үйлердің газа қосылу жөнінде де ақпарат берсеңіз.
– Қазақстан Республикасының заңнамаларына сәй­­кес көпқабатты тұрғын үйлерге, үйлердің өжіре­леріне немесе жапсарлас ғимаратқа газға арналған қазан­дық орнатуға тыйым салынған. Қазандық тұрғын үй ғимаратынан дербес ғимаратта орналасуы қажет. Оны пәтерлердің меншік иелері бірігіп орнатуына немесе «Өңірлерді дамыту-2020» бағдарламасы аясында меншік иелерінің келісімімен бюджет қаржысы есебінен кейін бөліп қайтару шартымен орнату мүмкіндіктері бар. Толығырақ ақпарат алу үшін аудандық тұрғын үй-коммуналдық шаруашылық, жолаушылар көлігі және автомобиль жолдары бөліміне хабарласуға болады.
– Газ бағасы жөнінде айтсаңыз.
Бүгінгі күнге «ҚазТрансГаз Аймақ» Қызылорда өндірістік филиалымен Қызылорда облысы бойынша таби­ғи газдың 1 м3 бағасы 21 теңге болып белгіленген.

Сұхбаттасқан Ақтөре ИБРАГИМҰЛЫ

23 қараша 2019 ж. 613 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам