Аудан спортшыларына құрмет көрсетілді

Ауданда спортпен шұғылданушылардың үлес салмағы 28,3 процентті құрайды. Сырдариялық спортшылар республикалық, халықаралық додаларда топ бастап жүр. Бір ғана көгалдағы хоккейдің өзінен аудан республикаға танымал. Одан бөлек спорт түрлерінен де сырдариялықтардың бәсі биік. Жақында ауданда өткен халықаралық волейбол турнирінде ауданның тоспадоп шеберлері өздерінің мықтылығын көрсетті. «Алтын күз» ауыл спортшыларының облыстық спартакиадасында аудан намысын қорғайтын спортшылар жыл сайын биік мінберден көрінуде. Биылғы жылы да спорттың әр түрінен бақ сынаған сырдариялықтар жалпы командалық есепте 3 орынды жеңіп алды. Айта берсе, жыл көлемінде көптеген жарыстардан спортшыларымыз жүлдемен оралып келеді.

Жақында спорт саласында айтарлықтай жетістікке жетіп жүрген спортшыларға құрмет көрсетілді. Аудан орталығындағы спорт кешенінде аталған салаға еңбегі сіңген және тұрақты спортпен шұғылданып жүрген жандар арнайы төсбелгімен марапатталды. Марапаттау рәсімінде аудан әкімінің орынбасары Д.Байдушев құттықтау сөз сөйледі.

– Тұңғыш Президент Н.Ә.Назарбаев «Сіздер мен біздер жасаған нәрсенің бәрі әрбір жеке адамның еңбегінен құралады» деген болатын. Барлығымыз марапат алу үшін емес, өзіміздің күнделікті ісімізді атқарамыз. Өзіміз үшін спортпен шұғылданамыз. Адам сүйікті ісіне жан-тәнімен беріліп, оған өзінің барлық күш-жігерін жұмсаған кезде сый-құрметке бөленеді. Сондықтан спорт саласында жемісті еңбек етіп жүрген жандарға құрметіміз мол, – деген аудан әкімінің орынбасары спортшыларды аудан әкімі Р.Рүстемовтің құттықтау хатымен марапаттады. Сондай-ақ Қазақстан Республикасының Тұңғыш Президенті – Елбасы тестілерін және ұлттық дайындық деңгейінің нормативтерін орындағаны үшін аудан спортшыларына айырым белгісі бар төсбелгіні табыс етті.

Е.БЕРКІНБАЕВ