Дәстүрлі ХХХVІІ облыстық спарта­киаданың қорытынды рәсімі аудандық мәдениет үйінде өтті. Ауқымды іс-шараға облыстық денешынықтыру, спорт және туризм басқарма басшысының орынбасары Жігер Айекешов, аудан әкімінің орынбасары Димаш Байдушев қатысып, жеңімпаз командаларды марапаттады.

– Спорт – саламатты өмір салтының ажырамас бөлігі. Бүгінде Ел Президентінің тапсырмасымен, Үкімет және облыс әкімі Нұрлыбек Машбекұлы Нәлібаевтың қолдауымен Сыр елінде спорт саласында қарқынды жұмыстар жүргізілуде. Бұқаралық спорт – ұлт саулығының кепілі. Дәстүрлі түрде өткізілетін «Алтын күз» спартакиадасы биыл Сырдария ауданында өз деңгейінде өтті. Спортшыларымызға арнайы алғыс білдіріп, жеңімпаздарды шын жүректен құттықтаймыз, – деді спорт және туризм басқарма басшысының орынбасары.

Өз кезегінде жеңімпаз командалар мен үздіктер марапат төрінен көрінді. Жалпыесептік қорытынды бойын­ша І орынды Шиелі ауданы жеңіп алды. ІІ орын Жаңақорған ауданына бұйырды. Ал жүлделі ІІІ орынды Сырдария ауданының спортшылары қанжығалады.

Спортшылар облыстық спартакиадада спорттың 16 түрінен бақ сынады. Оның ішінде баскетбол, волейбол, шағын футбол, қазақ күресі, бес асық, асық ату, тоғызқұмалақ, шахмат, көкпар, гір спорты, қол күрес, үстел теннисі, президент көпсайысы, қол добы, аударыспақ, теңге ілу, көрмеге тартылу спорт түрлері бойынша бақ сынады. Аудан спортшыларының жекелей спорт түрлерінен де көрсеткіші жақсы болды. Облыстық спартакиадаға облысқа қарасты жеті ауданнан 1000-ға тарта спортшы қатысты.

Айта кетейік, келесі жылы облыстық спартакиада алауы Жалағаш ауданында жағылатын болады. Салтанатты жиында аудан спортшылары спартакиада жа­лауын Жалағаш ауданының спортшыларына табыстады.