Жеңіс үшін аянып қалмаған командалар барынша ерік-жігерін таныта білгені аян. Ашылу салтанатында ҚР Гимні орындалды. Сонымен қатар жас спортшы рухына Құран бағышталып, көпшілік оны 1 минут үнсіздікпен еске алды. Жас спортшының бапкері Ақылбек Нұрахатов сөз сөйлеп, жарыс жолына шыққан әрбір командаға сәттілік тіледі.

– Бүгін менің шәкіртім – Сабыр Жұртшыбаевты еске алу турнирі өтіп жатқанына дән ризамын. Оның талабы таудай болатын. Әрқашан қарсыласқа өте сауатты дайындалып шығатын. Жұлдыздай жарқыраған ұлымыз маңдайымызға сыймай кетті. Оның болашағынан зор үміт күте білдік. Дәстүрге айналған аудандық турнир барысында жалындаған жас ғұмырдың есімі жаңғыра бермек,– деді білікті бапкер.

Бұл ретте, Сабырдың ағайын-туысы атынан Мақсат Мәліков пен Ақмарал Сәрсенбаева ұйымдастырушыларға шынайы алғысын жеткізді. Ал досы Сағи Сағидоллаев қазақ күресінен спорт шебері Сабыр Жұртшыбаевтың табандылығын, мықтылығын, орасан еңбе­гін, досқа адалдығын тілге тиек етті.

Бірнеше сағатқа созылған жарыс барысында ауданға қарасты жекелеген мекеме қызметкерлері мен әуес­қой спортшылар жеңіс тұғырынан көріну­ге тырысты. Тартысты ойын­да ерекше көзге түскен Мадияр Көшербаев «Үздік ойыншы» атанса, «Үздік қақпашы» номициясын 1990 жылы туған спортшылар командасынан Бексұлтан Әлтай иеленді. Ал өрт сөндіру бөлімінен «Үздік қорғаушыны» Әділет Кенжеев еншілесе, «Үздік шабуылшы» номинациясын «Күзет» бөлімінің ойыншысы Асхат Ысқақов қанжығасы­на байлады.

Жарыс қорытындысында жүлделі ІІІ орынды 1990 жылы туған спортшылар жеңіп алса, «Күзет» бөлімі екінші сатыға жайғасты. Ал жеңіс тұғырынан 1993 жылы туған спортшылар көрін­ді. Өз кезегінде аудандық жас­тар ресурс­тық орталығының дирек­торы­ның мін­де­тін атқарушы Нұржан Сейтжан, Сабырдың ағасы Батыр Бахытұлы, бапкері Жасұлан Каусов жеңім­паз командаларды марапат­­тап, қаржылай сый­лық табыстады.

Айта кетейік, Сабыр Жұртшы­баев­тың достары мал сойып, етін тұрмысы төмен отбасыларға таратты.