Жалындап өткен ғұмыр
Сырдария ауданында қазақша күрестен спорт шеберлігіне үміткер Сабыр Жұртшыбаевты еске алуға арналған турнир ұйымдастырылды. Небәрі 23 жасында көлік апатынан қыршын кеткен жалынды жасты еске алуға арналған турнирді өткізуге жаттықтырушысы Ж.Қауысов пен сыныптас достары ұйытқы болды. Мұндай игілікті іске аудандық дене шынықтыру және спорт бөлімі қолдау көрсетті.Орталық стадиондағы спорттық іс-шараның ашылу салтанатын аудандық мәслихат депутаты, «АМАNАТ» партиясының Сырдария аудандық филиалының «Жастар рухы» жастар қанатының жетекшісі Ақтөре Ибрагимұлы ашып, бала күнінен жанына спортты серік етіп, қайсар, өжет, батыл қасиетімен танылған Сабыр Жұртшыбаевтың есімі аудан жастарына етене таныс екенін, өмірден өткеніне 7 жыл уақыт өтсе де оның асыл бейнесі, жақсы қасиеттері ұмытылмайтынын атап өтті.
– Қазақ халқының тарихында ер-азаматтардың бейнесі ержүрек, батыл, батыр, қаһарман ұғымдарымен қатар айтылатыны белгілі. Біз білетін Сабыр сондай намысшыл, еңбекқор, қайсар азамат еді. Ол оқушы кезінен бастап спортты жанына серік етті. Өсе келе қазақша күрестен облыстық, республикалық жарыстарға қатысып, жеңімпаз атанды. Спортшы жас әркез қасиетті Сырдария ауданының намысын қорғап жүргенін мақтаныш ететін. Орта мектепті бітіргеннен кейін Алматы қаласындағы Қазақ спорт және туризм академиясында білім алып, жаттықтырушылық қызметті өзі туып-өскен ауданда бастады. Аға буынның, жастардың зор құрметіне ие болды. Сабырдың қай ортада да өзіндік орны, мәртебелі төрі болатын. Жасындай жарқ етіп, қысқа ғұмырында биік белестерді бағындыра білген азаматтың дүниеден ерте озғаны өкінішті. Бірақ Сабырды білетін, оның көзін көрген, сыйлас, сырлас азаматтар бар кезде оның аты өшпейді деп сенеміз. Біз аудан әкімдігіне, аудандық дене шынықтыру және спорт бөліміне тиісті ұсыныстар енгізіп, С.Жұртшыбаевты еске алуға арналған турнирді дәстүрлі түрде өткізуге жұмыс жасайтын боламыз, – деді аудандық мәслихат депутаты, «АМАNАТ» партиясының Сырдария аудандық филиалының «Жастар рухы» жастар қанатының жетекшісі Ақтөре Ибрагимұлы.
Мұнан соң аудандық мұсылмандар мешітінің бас имамы Асхат Асқарұлы марқұмның рухына Құран бағыштап, дұға етті. Сондай-ақ Сабыр Жұртшыбаевтың әпкесі Ақмарал мен ағасы Батыр сөз сөйлеп, бауырларын ұмытпай, еске алып, арнайы спорттық іс-шара ұйымдастырып жатқан барша азаматтарға отбасыларының атынан алғыс айтты. Бала күнінен намысшыл, қайсар, өжет болып өскен інілері жөнінде естеліктерімен бөлісті. Ал жарысты ұйымдастыруға ұйытқы болған жаттықтырушысы Ж.Қауысов шәкірті туралы тебірене сөйлеп, көз жасына ерік беріп, толқып тұрғанын атап өтті.
– Сабыр менің алғашқы шәкірттерімнің бірі еді. Тұла бойында қайсарлық қайнап тұратын. Тек алға ұмтылып, алдына биік мақсаттар қоятын. Жарыстарда ауданның намысын жоғары қойып, күш-жігерін, қарым-қабілетін боз кілемде барынша тез, шапшаң пайдаланатын. Біз осы турнирді Сабырдың туған күніне орай өткізіп жатырмыз. Біздің бастамамызға қолдау білдірген барша азаматтарға, қатысушы командаларға ризашылығымды білдіремін, – деді жаттықтырушы Жасұлан Қауысов.
Қазақша күрестен спорт шеберлігіне үміткер Сабыр Жұртшыбаевты еске алуға арналған турнирдің өтуіне оның сыныптас достары да белсене атсалысқан. Бұл туралы сыныптасы, аудандық Мемлекеттік кірістер басқарма басшысының міндетін атқарушы Бақытжан Ордабаев айтып өтті.
– Досымыз туралы өткен шақта сөз сөйлеу оңай емес. Ол осыдан жеті жыл бұрын көлік апаты салдарынан небәрі 23 жасында өмірден өтсе де біздің жанымызда, жүрегімізде. Біз Сабырды ешқашан ұмытпаймыз. Осы турнир алдағы уақытта да аудандық деңгейде дәстүрлі түрде өтеді деп сенеміз. Бүгін турнирге қатысушы командаларға сыныптас достарының атынан қаржылай сыйлықтар береміз. Сондай-ақ досымыздың артында қалған ұлы Мирасқа да турнирден естелік сый-сияпатымыз бар. Болашақта Мирасты озат оқушы әрі мықты спортшы болады деп үміттенеміз, – деді сыныптасы, аудандық Мемлекеттік кірістер басқарма басшысының міндетін атқарушы Бақытжан Ордабаев.
Турнирдің ашылу салтанатында Сабыр Жұртшыбаевтың достары кішкентай Мирасқа тиісті сыйлықтарын табыстаса, күрес бөлімінің жаттықтырушылары мен спортшылары күрес киімін (кимоно) кигізді. Мұнан соң турнирдің бас төрешісі Н.Жұмашев сөз алып, ойын шартын түсіндіріп, жеребе бойынша кездесетін командаларды хабарлады.
Жарысқа барлығы алты команда қатысты. Үш сағаттан астам уақытқа созылған кіші футбол турнирі тартысты өтті. Жеңімпаз болуға ұмтылған командалар тамаша ойын өрнегін көрсетті. Ең бастысы жарыс қатысушылардың жарақатынсыз қорытындыланып, жеңімпаздар да әділ анықталды. Жүлделі І орын «Өрт сөндірушілер» командасына бұйырса, ІІ орынды «Аудандық емхана» қанжығасына байлады. Ал ІІІ орынды ұпай санымен «Сабырдың сыныптастары» командасы иеленді. Бірақ жарыстың басты демеушілері, яғни «Сабырдың сыныптастары» командасының мүшелері өздеріне тиесілі ІІІ орынды «93-тер» командасына беріп, көпшілікке үлгі көрсетті. Тартысты турнирге қатысқан қалған командалар ынтыландыру сыйлықтарымен марапатталды. Жеңімпаздарға аудандық дене шынықтыру және спорт бөлімі тарапынан «Алғыс хат», медаль және С.Жұртшыбаевтың достарының атынан 30000, 20000, 10000, 5000 теңге көлемінде қаржылай сыйлықтар берілді.
Турнирдің қорытындысында аудандық дене шынықтыру және спорт бөлімі басшысының міндетін атқарушы Әйгерім Мешітбаева мен Сабыр Жұртшыбаевтың әпкесі Ақмарал, ағасы Батыр сөз сөйлеп, спорттық іс-шараны ұйымдастырушылар мен қатысушыларға тағы да шынайы алғыстарын айтты. Ал аудан жастары өздерімен қатар жүрген, спортта жоғары белестерді бағындырған, көлік апатынан қайтыс болып кеткен Сабыр Жұртшыбаевты еске алып, оның бейнесі көрініс тапқан үлкен билбордтың жанында естелік суретке түсіп, тарқасты.
Балтабай ОРДАБЕКОВ
