Жалындап өткен жас ғұмыр

Уақытында бозкілем үстінде ойнақ­таған кішкентай спортшының бола­шағынан бапкері зор үміт күтетін еді. Бала күнінен қарсылас шақ келтірмей даралана білген қа­ры­мы мықты спортшы Сабыр Жұрт­шыбаевтың есімі жерлестерінің есінде. Осыдан бірнеше жыл бұрын кел­местің кемесіне мінген қазақ кү­ресінің сайыпқыран спортшысын еске алуға арналған шағын футболдан екі жыл қатарынан аудандық турнир өткізіліп келеді. Бұл жолы да, аудандық мәдениет және спорт бөлімінің қолдауымен, Сабыр Жұрт­шыбаевтың достары мен жеке бап­кері Жасұлан Каусовтың бастасымен шағын футболдан аудандық турнир өз жалауын көтерді. Жарысқа аудандық мәслихат депутаты Ақтөре Ибрагимұлы, аудандық мұсылмандар мешітінің бас имамы Айбек Мәдиев, достары мен ағайын-туыстары қатысты.

Негізінен, әрбір футболсүйер жанкүйер бүгінгі жарыстан ерекше ойын күткені рас. Орталық алаңға жиналған қауымның деле­бесін қоздырған жарыста 5 топ өзара бақ сынады. Ең алдымен, ҚР мемлекеттік Гимні орындалды. Сонымен қатар аудандық мұсыл­мандар мешітінің бас имамы Айбек Мәдиев Сабыр Жұртшыбаевтың рухына арнап Құран бағыштады.

Турнирдің ашылу салтанатын­да Сабыр Бахытұлының апасы Ақ­марал Жұртшыбаева інісі жөнін­де естелігін көпшілікпен бөлісті.

– Менің бауырым қазақ кү­ре­сімен кішкентайынан айналысқан. Спортқа деген қызығу­шылығы басым болатын. Мектеп қабыр­ғасында жүргенде байрақты бәсе­келерден орын алып, отбасымызды қуантып жүретін. Күн са­йын оның өжеттілігін, қайсарлығын, батылдығын еске аламыз. Өт­кен жылы бастау алған турнир биыл жалғасын тапқанына қуа­ныш­тымыз. Бауырымның достары ізгілігі мол істерімен көпке үлгі болуда. Қай кезде де, олар­дың құрметіне ерекше ризашылы­ғы­мызды білдіреміз, – деді Ақма­рал Жұртшыбаева.

Өз кезегінде аяқдоп шеберлері айналым жүйесі бойынша сынға түсті. Айта кетейік, аудандық өрт сөн­діру бөлімі, Сырдария ауданы бойынша «Қазақ күресі» федерациясынан қос топ, «Құрдастар» және «Жамағат» тобының арасынан үздіктер анықталды. Не­гі­зінен, аудандық турнирдің жеңім­пазы деген атаққа аудандық өрт сөндіру бөлімінің спортшылары лайықты болды. Ал ІІ және ІІІ орынды қазақ күресінің қос тобы қанжығаларына байлады. Бұл ретте, «Үздік сұрмерген» номинация­сын Айсерік Смайлов, «Үздік қақ­пашы» номинациясын Талғат Са­­ғын­­дықов, «Үздік қорғаушы» но­ми­­нациясын Қайыржан Наушаев, «Үздік шабуылшы» номинация­сын­ Ернар Ос­пан иеленді.

– Біз Сабыр досымызбен 11 жыл бойы білімнің қарашаңырағы – №35 Иса Тоқтыбаев атындағы мектеп-лицейде білім алған болатынбыз. Әркез досымыздың қол жеткізген жетістіктерін мақтан тұ­та аламыз. Бүгін мән-мағынасы жоғары іс-шараның куәгері атан­дық. Досымыз ҚР спорт ше­бер­лігіне үміткер ретінде талай боз­кілемде шыңдалды. Қапияда көз жазып қалған досымыздың есі­мін ардақтау – біздің міндетіміз. Әрине, Сабырдың артынан ерген ұлы Мирасқа әрқашан қолдау көрсетуге дайынбыз, – деді достарының атынан сөз сөйлеген Нұрсұлтан Жақсымбетов.

Айта кетерлігі, демеушілер есе­бінен аудандық турнир жеңімпазы мен жүлдегерлеріне қаржылай сыйлық, диплом, арнайы футболка табысталды. Аудандық турнирге жиналған жұртшылыққа арнап Сабырдың достары арнайы ас-ауқат дайындады.

Балтабай ОРДАБЕКОВ