Журналистер жарыс жолында

Журналистика – сан қырлы сала. Сондықтан журналистерге жүктелетін міндет те, жауапкершілік те жоғары. Тек жаңалық таратумен ғана шектеліп қалмайтын қаламгерлер қауымы, қазақ баспа­сөзінің тарихы қалыптасқалы бері халықтың жанашыры болып, ақ сөйлеп, адал жазып жүр және ағарту­шылық қызметті де қатар атқарып келеді. Сондықтан ел-жұрт журналистерге «Төртінші би­лік» деп айдар тағып, ерекше құрметпен қарайды. Сол құрмет пен әріптестік байланыстың ая­сын­да Сырдария ауданында өңір журналистері арасында кіші футболдан облыстық турнир ұйымдастырылды.

Облыстық турнирді аудандық газеттің бас редакторы, Қазақстан Журналистер одағының мүшесі Ақтөре Ибрагимұлы жүргізді. Жа­рыс­тың ұйымдастырылу барысы мен хабарландыруға сәйкес 6 ко­­ман­дадан өтінім келіп түскенін айт­­қан ол аймақ журналистеріне спорттық бә­се­кеде сәттілік тілеп, аудан әкімі Берік Сәрменбаевқа сөз кезегін ұсынды.

Аудан басшысы журналистермен Сырдария ауданының спорт алаңында жүздескеніне қуанышты екенін айтып, қаламгерлердің атқа­рып жатқан қызметтерін жоғары бағалады.

– Журналист болу – халыққа қызмет ету. Сіздер осы міндетті жауап­кершілікпен атқарып, Сыр өңіріндегі, оның ішінде біздің Сырдария ауданындағы жаңалықтарды ақпараттандыруға зор үлес қосып келесіздер. Өңір жұртшылығы өздеріңіздің кәсіби шеберліктеріңіздің арқасын­да ауданда атқарылып жатқан жұмыстармен танысуда. Міне, осы сәтті пайдалана отырып, баршаңызға шынайы алғысымды жеткізгім ке­леді. Аймақ журналистерінің спортпен тұрақ­ты шұ­ғылданып, оның ішінде шағын футболдан көптеген жетістіктерге жетіп жүргенінен ха­бар­дармын. «Спорт – денсаулық кепілі» де­мекші ауданда өңір журналистерінің басын қо­сып, облыстық турнир ұйымдастыруды жөн са­надық. Бұл, бір жағынан, бұқаралық спортты дамыту болса, екіншіден сіздерге деген зор құрметіміз. Бүгінгі жарыста барлығыңызға сәт­тілік тілеймін, – деді аудан басшысы.

Мұнан кейін жеребе таратылып, командалар өзара екі топқа бөлінді. Ең алғашқы ойын «Мен­шікті тілшілер» және «Тіршілік тынысы» командасы арасында өтіп, 4/1 есебімен аяқталды. Екінші ойында «Қоғам.тв» мен «Бас­пасөз» коман­дасы 3/3 есебімен тең түссе, «Қызылорда» те­ле­арнасы командасы «Меншікті тілшілерге» 5/3 есебімен жол берді. Ең қызықты да тартысты ойын «Қоғам.тв» мен «Өңірлік ком­му­никациялар қызметі» командасы арасында өтті. Бұл жолы «Қоғам.тв» қарсыластарын 7/2 есебімен ұтты. Сәйкесінше «Тіршілік тынысы» мен «Қызылорда» телеарнасы командасы 4/4 есебімен тең түсті. Ал, «Өңірлік коммуникациялар қызметі» мен «Баспасөз» командасы арасындағы ойын 3/5 есебімен аяқталып, жар­ты­лай финалға «Баспасөз» командасы жолдама алды.

Жартылай финалдық ойындар «Қызылорда» телеарнасы мен «Қоғам.тв» командалары арасында өтті. Бұл жолы «Қызылорда» телеарнасы командасы қарсыластарын 8/1 есебімен жеңді. Сондай-ақ, «Баспасөз» командасы «Мен­шікті тілшілерден» 1/0 есебімен басым түсті. Төрешілердің шешімімен ІІІ орынға талас «Меншікті тілшілер» және «Қоғам.тв» командалары арасында өтті. Бұл жолы «Меншікті тілшілер» 6/5 есебімен әріптестерінен айласын арттырды. Ал, финалдық ойын «Қызылорда» теле­арнасы мен «Баспасөз» командасы арасында өрбіді. Бірінші таймда тек бір голдан соқ­қан қос команда екінші таймның соңына дейін осы есепке өзгеріс енгізе алмады. Тартысты әрі қызықты өткен турнирдің ақтық ойыны пенальти тебумен қорытындыланды. Ойынның соңғы минуттарына дейін жеңімпаз анықталмағаны турнирді тамашалауға жиналған көрерменге ерекше тебіреніс сыйлады. Пенальтидің нәти­жесінде 5/4 есебімен «Баспасөз» командасы турнирдің жеңімпазы атанды. Сондай-ақ, жекелеген аталымдар бойынша да үздіктер анықталды. «Үздік ойыншы» аталымы Талант Айымбетовке берілсе, Абзал Жолтерек «Үздік қақпашы» атанды. Ал Ержан Батыршаев «Үздік шабуылшы», Бауыржан Қожамұратов «Үздік қорғаушы» аталымын иеленді.

Жеңімпаз атанған командаларды аудан әкі­­­мі­нің орынбасары Д.Байдушев, аудан әкімі ап­паратының басшысы Р.Шайхиев, аудандық қо­ғамдық даму бөлімінің басшысы Б.Смайлов және «Сырдария – Нұрдария» қоғамдық қоры­ның төрағасы М.Омаров марапаттап, 100, 70, 50, 20 мың теңгелік сертификаттарды және медальдарды табыстады.

Айта кетейік, турнир аудандық қоғамдық даму бөлімінің сыбайлас жемқорлыққа қарсы төз­­беушілікті қалыптастыру бағытындағы әл­еу­меттік тапсырысы шеңберінде «Сырдария­ – Нұрдария» қоғамдық қорының ұйым­дас­ты­руымен өткізілді.

«Тт» ақпарат