Сырдариялық жас чемпион атанды
![](/uploads/posts/2022-11/medium/1669698446_316320222_1344618812979959_416360053485313956_n.jpg)
Бұрнағы күні облыс орталығындағы «Еуразия» спорт кешенінде ережесіз жекпе-жектен «ORDA ZHEKPE-ZHEK CHAMPIONSHIP» атты халықаралық турнир өтті. Оған елімізбен қатар шет мемлекеттер, атап айтқанда, Қырғызстан, Тәжікстан, Өзбекстаннан кәсіпқой спортшылар қатысты. Олардың қатарында аудан намысын қорғаған жігіттер де бар.
Халықаралық турнирде 14 жекпе-жек өткізілген. Оның екеуі титулдық жекпе-жек, яғни, чемпиондық атақты қорғап алу. Осындай жекпе-жекте жерлесіміз Ерасыл Мұратов қарсыластарын соққының астына алып, өздерінің мықтылығын дәлелдеді. Нәтижесінде, 55 келі салмақ дәрежесінде аудан атынан шыққан сырдариялық спортшы чемпион атанды. Жас спортшы шешуші кездесуде қарсыласына үдере соққы беріп, өз салмағында жеңімпаз атанды.
Бұдан бөлек, өңір намысын қорғаған Бейбітжан Қобланов титулдық атағын қорғаса, інісі Мағжан да чемпиондық атаққа қол жеткізгенін атап өту керек. Олар ауданға қарасты С.Сейфуллин ауылының тумасы. Балалық шақтарында отбасымен бірге облыс орталығына көшкен. Болаттай қос жігіттің кішісі өз салмағының жеңімпазы болса, үлкені Бейбітжан чемпиондық атағын қорғап қалды.
– Осыдан бір айдай бұрын желіде Бейбітжанмен пікірлесіп едім, алда ережесіз жекпе-жектен чемпиондық белдігін қорғайтындығын жеткізген болатын. Уақыт жақындаған сайын дайындығының жоғары дәрежеде жүріп жатқандығын, сол шақты асыға күтіп жүргенін, енді бірде дайындықтың толық та сәтті аяқталғанын желі арқылы жанкүйерлеріне және ескертіп тұрды. Сөйтіп жүргенде сол күн – чемпиондық белдікті сарапқа салатын уақыт та келіп қалыпты. Қырғызстанның, Тәжікстанның, Өзбекстанның, Алматы қаласының «Айбын», Қызылорда қаласының «Орда», Сырдария ауданының жекпе-жек клубтарының кіл мықтылары өздерін дәлелдеген сайыс болды. Осы сайыста біздің Бейбітжанмен Сардарбек атты Өзбекстан чемпионы жұдырық түйістірді. Біздің мақтанышымыз еш саспастан әртүрлі соққыларымен амал-айла әдістерін оңтайлы қолданғысы келген ала тақиялы қарсыласын бір минут шамасында «бұрап» тастады. Таза жеңіске жетті. «Еуразия» спорт кешені біраз уақытқа дейін көрермендердің дауысынан жаңғырып тұрды, – дейді чемпионға жанкүйер болған Б.Есназар.
Жалпы, осы халықаралық турнирде аймақ намысын қорғаған спортшылар чемпион атанып, мерейді үстем етті.
Е.БЕРКІНБАЕВ