Сырдария ауданына қарасты Қалжан ахун ауылынан елімізге белгілі көптеген тұлғалар түлеп-ұшқан. Тәуелсіз Қазақстанның өсіп-өркендеуіне өзіндік үлестерін қосқан олардың әрбірі жерлестер мақтанышы.

Жақында аталған ауылдың тумасы, Қызылорда облысы әкімінің "Сыр үміті" жастар сыйлығының иегері, жайдарман ойындарының жұлдызы Бақытбек Қарамырзаев өзі білім алған орта мектепке арнайы фотосуреттер стендтін сыйға тартты.

Стендте ауыл мектебінде ұстаздық қызмет атқарған, шәкірттерге сапалы білім, саналы тәрбие берген мерейлі мұғалімдердің суреттері ілінген. Сонымен қатар, "Қалдырған ізің мәңгілік..." деген жазу жазылған.

Мектеп түлегінің ерекше тартуына педагогикалық ұжым қызметкерлері дән риза. Туған жермен байланысын үзбеген жастар жанашыры алдағы уақытта да өзі туып-өскен ауылға қамқорлық көрсетуге дайын. Ол ауылдың талантты жастарын қолдау - ел дамуын алға жетелейді деп санайды.