Қалыптасқан дәстүр бойынша бір елді-мекенге іс-сапарға барғанда тілшімен сол ауылдық әкімдігінің қызметкері бірге жүріп, елді-мекеннің тыныс-тіршілігімен таныстыратыны белгілі жайт. Сол мақсатпен бір күн бұрын Іңкәрдария ауылдық әкімдігінің бас маманы Д.Бисеновпен хабарласқанбыз. Дегенмен, біз Іңкәрдарияда болғанымызда ауыл әкімі еңбек демалысында, бас маман Д.Бисенов аудан орталығына жұмыспен кетіпті. Бұл жолы ауылдық ардагерлер және қоғамдық кеңес төрағасы Ә.Сырлыбаев аралатты.

– Ауылдың инвесторы Қайрат Нұрсейітов мың болғыр азамат. Өңірімізге күріш, жоңышқа егіп, жерімізді түлетіп жатыр. Ауылдың күнкөрісі негізінен төрт түлікке байланысты. Инвестор ауыл тұрғындарына мал азығындық шөпті жеңілдетілген бағамен беруде. Сонымен қатар елді-мекеннің көркейту-көгалдандыру жұмыстарына көмегін тигізіп келеді. Ауылдағы қасиетті мекен саналатын «Мүлкілән» әулие қорымын қоршауға жәрдем берді. Жаңа мәдениет үйі айналасының, амбулаториялық емхананың жанындағы топырақты ауыс­тырып, көркейтуге көмектесті, – дейді Ә.Сырлыбаев.