Бұл ауылды ән мен жырдың, өнердің бесігі десек те болады. Өйткені, халықтық театр атағын алған өнер ұжымы аудандық мәдениет үйі мен осы Айдарлы да ғана бар. Айдарлы халық театры ауданның 90 жылдығына орай көрнекті драматург, жерлесіміз Қалтай Мұхамеджановтың «Өзіме де сол керек» атты екі актылы комедиясын сахналап, кент көрермендерінің назарына ұсынды. Өлмес шығармаларымен халық жүрегінде қалған ауданмен құрдас Қалағаңның фантазияға бай туындысы көрермендерді шат күлкіге бөледі. Ал, күлкі дегеніміз өз кезегінде өмірді ұзартатын дәрумен. Спектакль барысында рөлдерді ойнаған әртістердің шығармаға жан-жақты дайындықпен келгені көрініп тұрды. Әсіресе, театрдың режиссері, жергілікті өнерпаз Рахия Әбдікәрімованың ізденісі, шеберлігі айқын сезілді. Кент тұрғындары ауданның 90 жылдық торқалы тойына лайықты тарту жасаған айдарлылықтарға риза болды.