«Кітап оқы да, кемелден»: ауқымды жоба қайта жалғасады

Жиында аудан әкімінің орынбасары Талғат Нұртазаев Мемлекет басшысының жастар арасында кітап оқу мәдениетін қалыптастыруға қатысты бас­тамасына тоқталып, кітап – ұлттың рухани дамуы мен зияткерлік әлеуетін арттыратын басты құндылықтардың бірі екенін атап өтті.

– Кітап – ғасырлар бойы ұрпақтан-ұрпаққа жал­ғасып келе жатқан рухани қазына, баға жетпес байлық. Кітап – тек білімнің ғана емес, адамзаттың ақыл-ойы мен тәжірибесінің жиынтығы, тарихтың шынайы куәсі. Мемлекет басшысы Қасым-Жомарт Кемелұлы Тоқаев «Біз, ең алдымен, жастарды кітап оқуға баулуымыз керек. Сонда жаппай кітап оқитын ұлтқа айналамыз. Озық ойлы ұлт болудың төте жолы – кітап оқу» деп ерекше атап өтті. Ауданымызда кітап оқуға байланысты жақсы үрдіс қалыптасты. Жастардың кітапқа деген қызы­ғушылығын арттыру мақсатында бұған дейін 3 рет «Кітап оқы да, тұлға бол» байқауы өткізілген болатын. Аталған байқауға аудандағы жомарт жан­дар демеушілік жасап, оқушылардың білім көкжиегін кеңейтуге үлес қосты. Ұлт ұстазы Ахмет Байтұрсынұлы «Кітап – өткенді танытатын кілт, болашаққа бастайтын жол» деп атап көрсеткен. Сон­дықтан сарқылмас қазына – саналы ұрпақ өсірудің, ел болашағын кемел етудің кепілі саналады, – деді Талғат Мейрамханұлы.

Өз кезегінде жоба авторы Нұрмат Мансұр атал­ған байқаудың маңыздылығына тереңнен тоқ­талды.

– Кітап – өткен мен бүгінді жалғайтын алтын көпір, ұлттың рухани жадын сақтайтын баға жетпес мұра. Қай кезеңде болсын елдің өркендеуі білімді де зерделі азаматтың қалыптасуына байланысты. Ал білімнің бастауы – кітап. Сондықтан жас ұрпақтың кітапқа деген қызығушылығын арттыру, олар­дың оқу мәдениетін қалыптастыру – қоғамның ортақ міндеті деп білемін. Осы мақсатта Сырдария ауданында дәстүрлі түрде ұйымдастырылып келе жатқан байқау жылдан-жылға мазмұндық жағынан да, ауқымы жағынан да кеңейіп келеді. Биыл байқаудың аудан көлеміндегі 10 білім оша­ғында өткізілуі – кітапсүйер жастардың қатары артып келе жатқанын аңғартады. Әсіресе, әрбір ауылдағы жанашыр азаматтардың демеушілік жасап, жас оқырманды қолдауға атсалысуы – ел болашағына деген жанашырлықтың, руханиятқа деген құрметтің айқын көрінісі. Осындай аза­маттардың қолдауымен жас жеткіншектердің кітапқа жақындап, көркем әдебиет арқылы дүние­танымын кеңейтуіне мүмкіндік жасалып отыр. Байқау жеңімпаздарды анықтайтын жарыс деп есептелмейді. Жастардың кітапқа деген сүйіспеншілігін арттырып, олардың ой-өрісін кеңей­тетін, ұлттық құндылықты дәріптейтін тағылымды жоба. Осындай игі бастаманың нәтижесінде кітап оқуды өмір салтына айналдырған, ойы сергек, білімі терең, елдің ертеңіне жауапкершілікпен қарайтын жас буын қалыптасатынына сенемін. Барлық қатысушыға сәттілік тілеймін, кітапқа деген құштарлықтары ешқашан бәсеңдемесін, – деді Нұрмат Мансұр.

Байқаудың басты мақсаты – оқушының жазғы демалысын тиімді ұйымдастыру, бос уақытын мазмұнды өткізуге бағыт беру және көркем әде­биет арқылы олардың дүниетанымын кеңейту. Биыл байқау ауданның барлық 10 білім беру ұйымында ұйымдастырылып, 5-7 және 8-10 сынып оқушысы арасында өтеді. Әр жас ерекшелігіне сай көркем шығармалардың арнайы тізімі әзірленіп, қаты­сушыға ұсынылды. Жоба аясында әрбір ауыл­да жергілікті демеушінің қолдауымен үздік оқырмандар марапатталып, кітап оқуды насихаттау ісі кеңінен жалғасын табады. Осындай игі бас­тама жас ұрпақтың кітапқа деген сүйіспеншілігін арттырып, олардың рухани-танымдық әлеуетін дамы­туға зор мүмкіндік береді.

Осы ретте, Ә.Тәжібаев атындағы Қызылорда облыстық әмбебап ғылыми кітапханасы басшы­сының орынбасары Айгүл Есенқызы кітап оқу мәдениетін қалыптастырудың өзектілігіне тоқта­лып, қатысу­шыларға ізгі тілегін білдірді.

– Мемлекет басшысы Қасым-Жомарт Тоқаевтың жастардың кітап оқуға деген қызығушылығын арттыру, зерделі ұлт қалыптастыру жөніндегі тапсырмасы аясында Қызылорда облысында ауқымды жұмыс атқарылуда. Негізгі бағытта Ә.Тәжібаев атындағы Қызылорда облыстық әмбебап ғылыми кітапханасы өңірдегі барлық кітапханамен бір­ле­сіп, тұрғындардың, әсіресе балалар мен жас­тардың кітапқа деген сүйіспеншілігін қалып­тастыруға бағытталған көптеген жобаны жүзеге асырып келеді. Бүгінде облыс бойынша 209 мем­лекеттік кітапхана халыққа қызмет көрсетеді. Кітапханалардың тұрақты оқырмандарының саны 260 мыңнан асады, ал кітап қоры 4,5 миллионнан астам дананы құрайды. Бұл – өңір тұр­ғындарының кітапқа деген қызығушылығының жоғары екенін көрсететін маңызды көрсеткіш. Кітап – жай ғана ақпарат көзі емес, ол ұлттың рухани капиталы, мәдениеті мен тарихи жадының алтын арқауы. «Кітап керуені» жобасы да ауыл тұрғындарына рухани құндылықты насихаттауға тың серпін берді. Жоба аясында шалғай елді мекенге кітаптар жеткізіліп, түрлі әдеби-мәдени кездесу ұйымдастырылып, оқырман мен кітап ара­сындағы байланысты нығайтуға ерекше көңіл бөлінді. Облыстық кітапхана жанынан балалар мен жасөспірімдерге арналған түрлі оқу жобалары, әдеби байқаулар мен танымдық кездесулер тұрақты түрде өткізіліп келеді. Атап айтқанда, «Үздік оқырман» байқауы оқырманның кітапқа деген қызығушылығын арттырып, олардың оқу мәдениетін қалыптастыруға оң ықпал етеді. Осын­дай игі бастама арқылы біз кітап оқуды тек жарыс ретінде қарастырмай, өмірлік құндылыққа айналдыруды мақсат етеміз. Осы тұрғыдан ал­ғанда, Сырдария ауданында дәстүрлі түрде ұйым­дастырылып келе жатқан «Кітап оқы да, кемелден!» көркем әдебиет оқу байқауының маңызы ерекше. Ауқымды бастама балалардың жазғы демалысын тиімді ұйымдастырып қана қоймай, олардың кітаппен тұрақты дос болуына, көркем әдебиет арқылы ой-өрісін кеңейтіп, ұлттық және адамзаттық құндылықтарды бойына сіңіруіне жол ашады. Ең бастысы, мұндай жоба жас ұрпақтың бойында ізденімпаздықты, білімге құштарлықты және рухани жауапкершілікті қалыптастырады. Сондықтан бұл игі бастаманың алдағы уақытта да өз жалғасын тауып, өңірдің өзге аудандарына үлгі болатын тағылымды жобаға айналатынына сенім мол. Осындай ізгі іске үлес қосып жүрген ұйымдастырушыларға, демеушілерге және кітапсүйер оқырманға алғысымды білдіремін. Кітап оқитын ұрпақ – елдің ертеңін жарқын ететін ең үлкен күш, – деді А.Есенқызы.

Жиын соңында аудандық орталықтан­дырылған кітапханалар жүйесінің директоры Рүстембек Бай­ділдаев, білікті маман Сайра Сейтен байқау жө­нін­де ойларын ортаға салды.